Nominaciones a los premios Emmy:
Yá tenemos la llista nominaos a los premios más importantes de la televisión, y asina podemos ver que les series (y el show) que más rescamplen como les meyores del añu son: The Crown y The Mandalorian, con venticuatro nominaciones caúna, WandaVision con ventitrés, The Handsmaid’s Tale y Saturday Night Live con ventiuna y The Queen’s Gambit y la cancelada Lovecraft County con dieciocho. Na guerra de canales, HBO y HBO Max consiguen cientu trenta (sumando les de les dos), Netflix cuasi les aventaya con cientu ventinueve y Disney + consigue setenta y una.
Antonio Banderas n’Indiana Jones:
Por si nun vos enterastis, lleven tiempu pensando en facer una quinta película d’Indiana Jones na que Harrison Ford, tando pa facer ochenta años, va siguir siendo’l protagonista (cunten que foi una condición que punxo l’actor pa salir en Star Wars VII). Pos paez ser que yá escomenzaron a rodala, y acaben d’anunciar qu’Antonio Banderas va tener un papel importante, sumándose a Phoebe Waller-Bridge y Mads Mikkelsen. Eso sí, tovía nun sabemos si va ser collaciu, herederu’l sombreru o enemigu d’Indiana.
Torna la versión nueva de Star Trek:
Nel añu 2009 estrenaron una versión nueva de les hestories clásiques de Star Trek, usando los viaxes nel tiempu y los universos alternos como sida pa remocicar tolos personaxes clásicos. La cosa nun foi dafechu mal y sacaron una triloxía, pero ente que Chris Pine (el capitán Kirk) andaba faciendo películes con DC y Zoe Saldana (la teniente Uhura) con Marvel, arriendes de la tráxica muerte d’Anton Yelchin (Chekov), paecía que la cosa acababa ehí. Por embargu, agora anuncien que va salir lo menos otra película na mesma continuidá, dirixida por Matt Shakman (WandaVision) y pa la que yá roblaron el contratu los dos actores principales, Chris Pine y Zachary Quinto (Mister Spock).
