The Book Of Boba Fett:
Anque nel Disney Investor Day yá anunciaren un cientu series nueves de Star Wars, guardaren una sorpresa pal postrer capitulu de la segunda temporada de The Mandalorian. El spin-off, The Book of Bobba Fett, sal pa diciembre de 2021, va asitiase na mesma dómina que la serie madre y van protagonizala’l mesmu Boba Fett (Temuera Morrison) y la mercenaria que yá salió en The Mandalorian, Fennec Shand (Ming-Na Wen). Vien pa diciembre de 2021.
Series y películes de xuegos de Playstation:
Sony ta tresnando nada menos que diez proyeutos audiovisuales basaos nes sos franquicies, lo que sedríen siete series y trés películes. Pel momentu namás sabemos de la película d’Uncharted, con Tom Holland nel papel del buscador d’ayalgues Nathan Drake, y d’una serie pa HBO basada en The Last of Us. Taremos al tanto de les nueves pa cuntavos a qué más anden.
Electric State:
Los hermanos Russo siguen dirixendo adautaciones, magar que pasen de les de superhéroes a una enforma más indie. Con Millie Bobby Brown de protagonista, van facer la película de The Electric State, una obra de Simon Stålenhag qu’anda a caballu ente la novela gráfica y el llibru ilustráu. La hestoria asítiase nunos ucrónicos años noventa llueu de la Tercer Guerra Mundial, y trata d’una mocina y un robó que percuerren l’América d’aquel mundu afaráu.
MGM a la venta:
Si tenéis 5.500 millones de dólares (dizse pronto) podéis mercar Metro Goldwyn Mayer, la gran compaña estaoxunidense que produxo películes mítiques tanto como Ben-Hur, el Tarzán de Weismüller, Singin’ in the Rain, Mogambo, Forbidden Planet, Doctor Zhivago, 2001, Clash of the Titans o cuasi toles de James Bond, ente munches otres. Entovía nun sabemos qué xigante audiovisual va facese coles miles de películes que s’alluguen nel so catálogu, pero pinta qu’en dellos años van empecipiar a salir unes cuantes versiones o partes nueves de películes sos.
