Premios Eisner 2021:

Mientres que la selmana pasada falábemos de los Emmy, los premios más nomaos de la televisión, güei toquen los Eisner, los análogos del cómic. Rellumen como ganadores, con dos premios caún:
- When the Menopausal Carnival Comes to Town, el cómic indie que mira de romper tabús sobre la salú reproductiva de les muyeres. Gana l’Eisner a meyor antoloxía y el d’a meyor hestoria curtia (de la que l’autora ye Mimi Pond).
- Superman’s Pal Jimmy Olsen de Matt Fraction y Steve Lieber, serie sobre’l fotógrafu mocín del Daily Planet que lleva’l mesmu nome de la que protagonizaba ente los años cincuenta y los setenta. Gana’l d’a meyor serie d’humor y el d’a meyor miniserie.
- Usagi Yojimbo, la serie de Stan Sakai pa IDW na que sigue cuntando les aventures del so coneyu samurái. Gana’l d’a meyor serie regular y el d’a meyor rotulista.
Tamién ameriten mentase otres obres, poques gracies, como puen ser la serie nueva de Black Widow de Kelly Thompson y Elena Casagrande (sacada por razón de la estrena la película pero que ta destacando por sí mesma) o’l cómic infantil Superman Smashes the Klan de Gene Luen Yang y Gurihiru, onde l’héroe s’enfrenta a la organización supremacista blanca.
Serie sobre les sobrevivientes al asesín:

HBO ta desenvolviendo una serie basada na novela The Final Girl Support Group, na que sobrevivientes a los clásicos asesinos sicópates de les películes s’axunten pa parllar de los sos traumes, talamente como nun grupu d’alcohólicos anónimos o de pol estilu. Tres de la serie van tar Charlize Theron (col sellu Denver & Dalila Films) y los hermanos Muschietti (los de la versión nueva d’It).
Superhéroes afroamericanos:

Si Marvel yá tenía a Marhershala Ali p’anduviar a Wesley Snipes nel papel de Blade, agora tamién anuncien el direutor de la película viniente, Stacey Osei-Kuffour (Mogul Mowgli). Eso sí, calculen que nun van principiar a rodar fasta mediaos de 2022, conque como poco saldrá pa 2023.
Mentanto, el sitiu web Collider anuncia que HBO ta tresnando una serie sobre Val-Zod (un Superman “afrokryptonián” d’un universu paralelu), y que Michael B. Jordan taría por protagonizala. Tovía nun ye seguro si tamién tiraríen p’alantre cola idea d’una película onde al Superman clásicu lu encarnaría otru actor afroamericanu, o si con esto yá se daríen por satisfechos.