Denuncies a Disney:
Ye bastante normal que les estrelles de Hollywood cobren un pequeñu porcentaxe de lo recaldao nos cines, y talu yera’l casu de Scarlett Johansson en Black Widow. Por embargu, la película estrenáronla al empar na plataforma Disney +, conque l’actriz acaba decidir denunciar a Disney poles perdes qu’esto-y causó. Disney respuende acusándola de ser insensible a la situación d’anguaño y al efeutu del andanciu na venta d’entraes, pero’l casu ye que nun hebo una renegociación del alcuerdu pa que dambes dos partes quedaren contentes. Amás, cunten qu’Emma Stone ta atalantando si siguir l’exemplu de Johansson, y denunciar asina por un casu idénticu cola estrena de Cruella.
La polémica de los Masters:
Les redes sociales tuvieron bullendo esta selmana poles reaiciones a la nueva serie animada de los llamaos Masters del Universu. Ensin desvelar nada, solo diremos que’l protagonismu de la temporada acostaciólu Teela (personaxe femenín principal) y non el míticu He-Man, lo que provocó grandes berrinches de paisanos qu’esperaben dalgo más asemeyao a la serie de cuando yeren rapazos. Kevin Smith, al cargu de la serie y que dicía querer “amarveliala” sirviendo recetes nueves colos ingredientes señardaos de cuando se ye guaḥe, respondió non mui falatible que son mui pininos si creyen que los cambeos de status quo puen ser duraderos nun productu de tala mena, y qu’aceuten que yá salíen muyeres y teníen un papel importante en tolos episodios de la serie orixinal.
Serie d’aición real de Pokemon:
Anuncien que Netflix ta desenvolviendo una serie de los monstruínos más nomaos de Nintendo, que paez ser que va axuntar actores reales con imáxenes dixitales neto que la película Detective Pokemon (masque entá nun sabemos si va tener rellación con ella). Tovía tán principiando y nun hai trama asoleyada, pero sí se sabe que’l guionista y productor executivu va ser Joe Henderson (Lucifer).
