Continuación de Chronicle:
Nun sabemos si recordaréis Chronicle, una película de “metraxe atopao” (que fai como si lo qu’asocede nella fora real y lo grabaren los protagonistes) y que diba d’unos rapazos que consiguíen superpoderes pero que pronto se-yos diben de les manes. Pos agora, cuasi diez años dempués, anuncien qu’anden trabayando nuna continuación, protagonizada por moces y que pondría’l focu nel espardimientu de noticies falses y los atapamientos.
Star Trek a esgaya:
Por si nun fora poco coles series que yá tenemos de Star Trek, esto ye, Discovery y Lower Decks, y les que tán pa salir, esto ye, Strange New Worlds y Prodigy, agora paez ser que tán desenvolviendo otres dos, Section 31 (sobre la división d’operaciones secretes de la Federación) y Starfleet Academy (esto ye, l’academia na qu’estudien pa llueu pilotar les naves espaciales). Ye una de les poques franquicies fuertes que tien Paramount, y abulta que quier esplotala al máximu pa la so canal de streaming.
Marvel mete mieu:
Cuerre la voz de que Disney + ta trabayando nuna serie de Werewolf by Night, l’home llobu de Marvel que ñació allá pelos setenta, cuando la compaña tevo esperimentando colos cómics d’horror. Aínda nun ye seguro, ye dalgo que se diz peles páxines especializaes, conque tovía menos podemos dicir si se trataría d’una serie sobre’l personaxe orixinal, Jack Russell (sí, como la raza de perru), o de Jake Gómez, un nativu americanu presentáu apocayá y con un nome enforma menos fatu.
