Los Addams nuevos:
Va tiempu que sabemos que Tim Burton anda tres d’una serie nueva sobre la familia Addams, anque esta va tar centrada na fía, Miércoles, y paez ser qu’amás-y va dar un rollu harrypotterín de misteriu sobrenatural nun internáu. Agora emprimen a llegar noticies de quiénes van ser los actores, y yá asoleyaron que Catherine Zeta-Jones va ser la Morticia nueva y Luis Guzmán el Gómez nuevu.
Películes DC direutes pa televisión:
Yá lleven bastante falando de que Warner diba acutar dellos superhéroes pa facer películes de menos presupuestu, que diríen direutes pa la canal en streaming HBO Max, y ente los que s’alcontraríen Batgirl y Blue Beetle. Agora anuncien que yá tan tresnando otra de Black Canary, y que va asegundar nel papel l’actriz Jurnee Smollet, la que yá la interpretó na película Birds of Prey.
Más continuaciones superheroiques:
Howard Mackie acaba roblar el contratu pol que va protagonizar la cuarta película del Capitán América, llueu de que’l so personaxe heredara l’escudu na serie The Falcon and the Winter Soldier. Per otru llau, James Wan quedó ensin poder facer una película de mieu sobre homes-pexe de calume que diba ser spin-off d’Aquaman, pero diz que va aprovechar les idees que tenía n’Aquaman 2, y que va tar bien basada nel clásicu italianu d’horror Terrore nello spazio.
Amás d’esto, y agora que Scarlett Johansson denunció a Disney y abulta que nun van contratala otra vuelta no que-y queda de vida (por si nun vos enterastis tenéis la noticia equí), cuerre’l rumor de que Warner ta interesada en fichala, quiciabes pa una película de les Gotham City Sirens (la xunión de Harley Quinn, Catwoman y Poison Ivy).
Y más Masters del Universu:
N’estrenando la perpolémica serie de Kevin Smith, que fixo bullir les redes sociales unes cuantes selmanes, paez ser que Netflix quier siguir esplotando’l filón de He-Man y anuncia otra serie más, tando esta orientada a la reciella en cuenta d’a los señardosos de l’antigua. Si vos peta podéis ver el traile equí.
