La lluna escontra la tierra:
Roland Emmerich, el direutor conocíu polo que-y presta afarar ciudaes nes películes (como n’Independence Day, na Godzilla de 1998, en The Day After Tomorrow o en 2012) vuelve a la carga en Moonfall, película del xéneru “estrozu” que tien como premisa, como yá podréis maxinar, que la lluna sal d’órbita y vien pa escontra la tierra. Halle Berry ye l’actriz protagonista, encarnando una ex-astronauta que sabe cómo salvar la humanidá (podemos albidrar que nun entamu nun-y van facer munchu casu), y acompáñenla Patrick Wilson (The Conjuring) y John Bradley-West (Game of Thrones). Va estrenase en febreru de 2022 y, si vos interesa, podéis ver el traile calcando equí.
Otra gran serie d’Amazon:
La canal de streaming nun ta pa estrenar namás que’l bombazu d’El señor de los aniellos, tamién ta gastando unes bones perres n’otros proyeutos. Ún d’estos ye l’adautación de The Wheel of Time, que resulta que ye la saga de fantasía más vendida tres de la de Tolkien, con nada menos que catorce noveles asoleyaes. Va estrenase yá’l 19 de payares, y si queréis ver el traile tamién lu tenéis equí.
Continuaciones a esgaya:
Disney paez pescanciar que si los cines nun tán averbenaos ye pola mor del andanciu, porque anque la superproducción d’aventures nel Amazones, Jungle Cruise, tovía nun foi a recuperar toles perres que costó, yá anuncien tar desendolcando una segunda parte. Per otra parte, tamién ta en marcha la cuarta película de The Expendables, la saga qu’axunta tolos grandes actores d’aición de décades pasaes. Ah, y tamién ta que Netflix se fixo cola película nueva de the Texas Chainsaw Massacre, que paez ser que va dexar pa prau toles continuaciones pa partir de nueves dende la primera.
