Elencu de primera pa Super Mario:
En 2017 ficieron una película d’animación de Super Mario, que por unes coses o por otres nun peracabaron endagora. Pos resulta que la selmana pasada anunciaron un repartu de voces bien llamaderu, ente les que s’alcuentren Chris Pratt (Guardians of the Galaxy) como Super Mario, Anna Taylor-Joy (The Queen’s Gambit) como la Princesa Piescu y Jack Black (Goosebumps) como’l malváu Kuppa. Poques gracies, esta noticia disparó les especulaciones en redes sobre cómo se veríen nuna película d’aición, y tamién una riestra crítiques por nun escoyer un italofalante pal papel principal.
Película de Saint Seiya:
De lo que sí que daveres tán desendolcando por fin una película d’aición real ye de los míticos caballeros del zodiacu, dempués d’andar falando d’ello como diez años. Van facela Toei y Sony damedies, y yá roblaron salir nella actores como Mackenyu (el mocín de les adautaciones a aición real de Rurouni Kenshin) faciendo de Pegasu, Madison Iseman (Jumanji) como Atenea/Sienna o Sean Bean (Game of Thrones) como’l maestru del primeru.
La vuelta de Teen Wolf:
Si sois millennials esperando que seya’l de Michael J. Fox pidímosvos perdón, porque nos referimos a la serie que duró de 2011 hasta 2017. Y ye que la canal Paramount + ta desendolcando una película que va sirvir de continuación y que cuenta col mesmu creador, Jeff Davis, y cuasi tolos actores orixinales. Davis ta ocupadín últimamente, porque tamién anda tres d’una serie que va adautar la saga de llibros Wolf Pack y de la vuelta al cine d’Aeon Flux (serie de dibuxos de la que yá estrenaron una película en 2005).
