La vuelta de Babylon 5:
La serie noventera de ciencia-ficción, creada pol afamáu guionista de cómics J. Michael Straczysnki, torna de la mano del mesmu. Esta trataba, creándose al rau de Star Trek, les volátiles rellaciones diplomátiques y comerciales ente abondes races estraterrestres, siempre a puntín d’entamar una guerra. De la serie nueva cuenten que va ser un reiniciu dende cero, conque nengún de los actores orixinales confirmó que vaiga apaecer. Tán desendolcándola pa la canal CW, enfocada en programes pa xente mozo, pero al ser propiedá de Warner Bros nun sedría raro qu’acabara tamién en HBO Max.
Alcuerdu ente Disney y Scarlett Johansson:
Va unos meses falábemos de la denuncia que l’actriz punxera a Disney, pola mor de que por contratu llevaba una parte de la recaldación en cines, bien afeutada pola estrena al empar en Disney Plus. El espolín foi considerable, Emma Stone tevo pa facer lo mesmo pola estrena de Cruella y estrelles como Elizabeth Olsen posicionáronse a favor de l’actriz. Agora podemos informar de que la cosa nun va acabar en burrera, porque yá llegaron a un alcuerdu pol que la compaña va pagar más de cuarenta millones de dólares a Johansson. Había rumores de que tovía queríen sacar a la Vilba Negra nuna o dos películes, lo que, al acabar amistoso, paez que sigue siendo dable.
Pondera de The Boys:
Ta claro que The Boys, la serie p’adultos de superhéroes matachinos, ye ún de los mayores ésitos d’Amazon Prime, y otru niciu d’ello ye que yá anden a desendolcar una serie asitiada nel mesmu mundu. Esta, anque nun tien títulu tanina, va mostrar lo competitiva que ye la vida nuna universidá de superhéroes, y de xuru que los protagonistes van tener una moral tan turbia como los de la serie madre.
