Tres la posa d’añu nuevu, torna’l boletín selmanal coles nueves más llamaderes del mundu friqui. Y ensin lu apostalgar con más entamu, ehí vamos:

Películes y series DC en HBO Max

L’otru día falábemos de que van estrenar la versión de Justice League de Zack Snyder nesta canal de streaming, a mou de miniserie de cuatro episodios. Paez que Warner ta garrando-y gustu a sacar les películes nesti mediu (HBO pertenez-y) y, magar que tien planiaes cuatro estrenes en cines cada añu, va dexar les de los personaxes menos conocíos, como Batgirl o Static Shock, pa la plataforma de pagu. Tamién tán pensado en delles series que funcionen como spin-offs de les películes a midida qu’estes vaigan saliendo, como una de los policíes de Gotham llueu de la estrena’l Batman de Robert Pattinson (en 2022).

Army of the Dead:

Siguimos con Zack Snyder, y ye que va tiempu que trabaya nuna película de zombis pa Netflix, col títulu Army of the Dead y protagonizada por Dave Bautista. La canal ta poniendo toles ganes en proyeutu y yá anuncien una precuela y una serie de dibuxos animaos asitiada nel mesmu universu. Netflix lleva muncho mirando de consiguir una franquicia propia con puxu (con posibles fallíos como Bright), y paez que-y ve a la película traces de ser a ello.

Revilvamientu de Resident Evil:

Prometen que l’adautación nueva al cine va tar más pegada a la obra orixinal que’l ciclu anterior, lo que tampoco nun sedría mui difícil. Abulta que va centrase n’escenificar les dos primeres partes del videoxuegu de Capcom, y protagonícenla Kaya Scodelario (The Maze Runner) como Claire Redfield, Hannah John-Kamen (Killjoys) como Jill Valentine y Robbie Amell (Uploaded) como Chris Redfield. La estrena ta datada pa setiembre d’esti añu.

La casa de papel coreana:

La serie española que namoró’l mundu enteru va finar cola quinta temporada (na que s’incorporen Miguel Ángel Silvestre y Patrick Criado), anque, sorprendentemente, Netflix anuncia que ta tresnando una versión coreana. Entá sabemos poco, qu’encargaron doce episodios y que yá tien direutor y guionista. Pue ser interesante ver cómo entiende’l conceutu una cultura tan estremada

Leave a Reply

La to direición de corréu nun va espublizase. Los campos riquíos márquense con *