Superman sal del armariu:
La cosa tien trucu, y ye qu’agora lleva’l nome del héroe’l so fíu, Jon Kent, mientres el pá anda de viaxe pel espaciu. Bono, pos resulta que Jon tenía un amigu, Jay Nakamura, qu’en payares va pasar a ser dalgo más. Yá qu’en pasáu tevo una rellación amorosa con Saturn Girl, superheroína del sieglu XXI, esto convierte a Jon nel primer Superman bisexual de la historia. L’espolín nes redes foi como suel ser, poques gracies, sobre manera polos titulares llamaderos de pol estilu de “agora Superman ye bisexual”, o mesmamente’l que punximos a esti párrafu.
Series a esgaya pa muyeres Marvel:
Tres del ésitu de Wandavision ta ruxéndose que desendolquen dos ponderes de la serie, una sobre la bruxa Agatha Harkness y otra sobre Monica Rambeau, la superheroína conocida como una de los Capitanes Marvel, Spectrum, Púlsar o Fotón. Tamién dicen qu’anden pensando n’otra de la miniserie The Winter Soldier & the Falcon, esta sobre la ex-axente de SHIELD Sharon Carter (y, como se descubre na final de la serie, con una profesión nueva y bien interesante), y otra de Shang-Chi, protagonizada pola hermana d’esti, Xialing (tamién con un status quo determináu que ye meyor nun mentar pa quien nun viera tovía la película).
Dos películes anunciaes:
Per un llau tenemos que Jaume Balagueró, direutor de Rec, ta pa facer una llamada Venus, basada nel cuentu de H. P. Lovecraft The Dreams in the Witch House. Yá cuenta con Ester Expósito n’elencu, y diz que va ser “d’un horror escomanáu, violenta y puerca”.
Per otru, tenemos un anunciu de que van facer una película de Prophet, ún de los superhéroes de Rob Liefeld colos que tán siempre mariando de si los lleven a la pantalla o non. Con dellos cambeos respeutive al cómic, trata sobre un home (Jake Gyllenhaal) al que nos años cuarenta convierten en supersoldáu y crioxenicen pa que cumpla misiones en futuru, y cuando espierta nos sesenta nun-y presta nada lo que ve.
