DC Fandome:
Tenemos novedaes a esgaya de DC, y ye que guardaben un montón de coses pal eventu nomáu DC Fandome. De mano, podéis ver un traile de la película nueva de Batman calcando nel nome, otru de la del antihéroe Black Adam, y tamién ún de la serie d’El Pacificador, una pondera de The Suicide Squad. D’estos caberos salió tamién el traile’l videoxuegu Suicide Squad: Kill the Justice League, y no tocante a xuegos tenemos tamién el de Gotham Knights, onde vamos poder manexar la denomada bat-familia, los collacios de Batman na llucha escontra’l crime (Nightwing, Red Hood, Robin y Batgirl).
Bono, y arriendes de too esto, tamién tenemos confirmación de que siguen p’alantre proyeutos como Aquaman 2, Shazam: Fury of the Gods, Flash y la tercer película de Wonder Woman.
Dune va pa triloxía:
Tres del ésitu de crítica de l’adautación nueva de Dune, el direutor Denis Villeneuve anuncia que yá ta claro que van facer una continuación, y que la so idea ye terminar pelo menos una triloxía. Teniendo en cuenta que Frank Herbert escribió seis noveles, y los fíos d’esti otres milenta, si’l cine recupera ta claro que tienen material pa delles décades.
Anime en Disney Plus:
Paez ser que ta viéndose muncho la serie Star Wars Visions, una antoloxía onde estudios d’animación distintos presenten hestories de la saga con estilos mui pecuñares, conque Disney va apostar por facer más anime. Amás d’una segunda temporada d’esta, yá anda trabayando en cuatro series propies: Twisted Wonderland (basada nel videoxuegu col mesmu nome), Summer Time Rendering (adautación del manga de suspense de Tanaka Yasuki), Black Rock Shooter Dawn Fall (franquicia ñacida con una película animada en 2010) y Yoyohan Time Machine Blues (basada nuna novela de Morimi Tomihiko).
