Los autores de cómic sindíquense:
Dellos trabayadores de la editorial Image Comics súmense al movimientu pol sindicamientu qu’últimamente percuerre los EEXX, y asina anuncien la creación de Comic Book Workers United, una organización a la busca de condiciones llaborales meyores pal gremiu. Nun dexa de ser paradóxico qu’esto asoceda nuna editorial creada por autores que, cansos del tratu que-yos daben Marvel y DC, prometíen crear un llugar onde los creadores s’afayaren y se-yos reconociera l’autoría de les obres talamente como ameritaben.
Ana de Armas, asesina baillarina:
Tres del ésitu de crítiques polos papeles qu’interpretó en Knives Out y la última de James Bond, cuenten qu’anden a fichar a l’actriz cubana pa Ballerina, película asitiada n’universu de John Wick. Na tercer película d’esta saga contaben que mientres qu’a los homes los entrenen p’asesinos per aciu de la llucha llibre, a les muyeres entrénenles con balé, colo que yá podemos maxinar que la película va ser llamadera pelo menos poles coreografíes de les engarriaes.
Lightyear, el moñecu faise real:
El moñecu de Toy Story, l’astronauta Buzz Lightyear, ta pa tener una película propia, non como moñecu, sinón como’l personaxe que se supón que lu inspiró (el direutor esplica que la película sedría dalgo asina como la que fizo qu’Andy quixera’l moñecu, anque la rellación con Toy Story nun dea más). Yá tenemos traile (que pues ver equí), con Chris Evans poniendo voz al héroe. Van estrenala, si nun hai sorpreses, pa branu de 2022.
