Tol Universu Marvel n’IMAX:
Yá podemos esfrutar en Disney + de toles películes Marvel atamañaes a IMAX, dende Iron Man hasta Shang-Chi, desapaeciendo les barrines negres d’enriba y embaxo que salíen nes televisiones modernes por tener proporciones diferentes. La compaña asegura que nun hai perda d’imaxe polos recortes, yá que les películes se grabaron teniendo en cuenta la posibilidá de facelo.
Más xuegu del xibión:
Masque Netflix tovía nun lo anunció de manera oficial, Hwang Dong-hyuk, creador de Squid Game, yá diz que va haber segunda temporada de la serie, magar que nun empiezu tenía la idea de que fora temporada única. Tampoco nun ye dalgo que sorprienda, pos la primer temporada convirtióse na serie más vista de la historia de Netflix.
Conflictos llaborales n’Image:
La selmana pasada falábemos de la creación d’un sindicatu d’autores de cómic que reclamen unes condiciones meyores per parte de la editorial Image, la que paradóxicamente ñaciera al rebotase dellos autores col tratu que recibíen ellos de Marvel y DC. Pos paez que va arder Bayona, porque la editorial diz que nun reconoz esta organización, Comic Book Workers United, como un interlocutor válidu. Vamos dir informando de lo qu’asocede, porque abulta qu’esto ta lloñe de resolvese.
