Mega Man n’aición real:
Yá oyéremos falar d’una adautación al cine de Mega Man, la saga de videoxuegos de Capcom, pero d’aquella yera per parte de Fox y poco enantes de que la comprara Disney. Endagora nun sabíemos nada d’en que quedara la cosa, pero agora anuncien que Netflix ye la que va estrenar la película.
The Last Train to New York:
Busanhaeng o Train to Busan, la yá saga coreana de zombis (con dos películes estrenaes y la idea de facer una tercera) apuerta a Hollywood con una versión asitiada nos EE.XX., The Last Train to New York. Yá sabemos que’l direutor va ser l’indonesiu Timo Tjahjanto, la productora Atomic Monster (del direutor James Wan) y que tien como fecha d’estrena’l 21 d’abril de 2023.
Serie de The Goonies… más o menos:
Va tiempu que Disney fala de facer dalgo col clásicu de los ochenta, pero paez que la vuelta del títulu va ser un poco distinta de lo que podría esperase. Cuenten que la idea de la serie nueva ye la de presentar unos guaḥes que quieren facer un remake de la película, xera na que va ayudalos una maestra acabante llegar y que guarda un gran secretu. Pa saber cuálu, habrá qu’esperar a vela.
Punisher cambia’l logo:
Marvel tien un problema que lleva años ensin saber resolver, y ye que grupos ultraderechistes, ente los que s’alcuentren policíes y militares, apropiáronse de la calavera’l personaxe. Yá lleven unos cuantos intentos d’alloñar l’antihéroe d’idees tales, ente elles facelu enfrentase a nazis, pero nun son a dexuncilu d’estes asociaciones. Paez bultable qu’esta ye la razón pola que van cambiar el diseñu la calavera na so serie nueva d’hestorietes, cola sida de que se convierte en miembru de la secta ninja The Hand. Queda por ver si’l cambéu va ser duraderu o en poco van dexalu pa prau.
