Más Cobra Kai:
¿Ya vistis la temporada nueva de la meyor serie de karatecas qu’enxamás fixeren? Bono, tampoco nun ye qu’heba demasiaes, pero ye mui bona. Si quedastis con ganes de más, nun vos esmolecer, porque los creadores dicen que tienen pensao lo menos otres dos temporaes, y que tán rabilando si facer dalgún spin-off. Si la cosa va p’alantre contarémosvos en cuantes lo anuncien en qué personaxes se centrarán les series hermanes.
Sé lo que fixistis l’últimu branu:
La serie televisión, que se basa na mesma novela que la mítica película de mieu, I Know What You Did Last Summer, yá tien repartu. Paez que Madison Iseman (Jumanji) va ser la protagonista, y va salir otra xente qu’anque mozo yá ta avezao a tar énte la cámara. Ye’l casu de Brianne Tju (Light as a Feather), o de la modelu Ashley Moore. Ente la serie esta y la nueva de Scream, paez que 2021 vien fuerte pa aquellos a los que nos prestaben les películes de mieu de los noventa. Bono, de fechu, tamién tán falando de revilvar Urban Legend.
Supervillanos en capitoliu:
Va años que la ultraderecha estaoxunidense tien usao el símbolu de Punisher, inclusive axentes de policía poniéndolu n’uniforme. La manifestación qu’asedió’l Capitoliu nun foi una esceición, y tamién apaecieron aperíos estravagantes rellacionaos col Capitán América. El fíu de Jack Kirby, co-creador d’esti caberu, pronuncióse al respeutive pa dicir que Donald Trump ye l’antítesis del héroe, y que dar esi usu retorcíu a la simboloxía que crearon so pá y Joe Simon ye insultar la so memoria. Tocántenes al xusticieru, ye verdá que, por munchu que tiente Marvel/Disney d’estremase d’ello, el calter del antihéroe sí casa más col de los manifestantes, y yá hai quien pide que dexen d’asoleyar hestories nes qu’apaeza. Quiciabes una solución sedría qu’afonden naquella hestoria na que Wolverine tropieza una revista de culturistes curiosinos pente les coses de Punisher, pa que los ultraderechistes de masculinidá fráxil quiten de llevar la calavera.
