Red Notice va pa triloxía
La superproducción de Netlfix, la que foi la más costosa (más de doscientos millones de dólares) y la más esitosa de tola so historia (anque d’esto último-y quitaron el puestu en trés selmanes), tien yá dos continuaciones programaes. La película, con The Rock, Ryan Reynolds y Gal Gadot como protagonistes, amestaba la temática de robos cola d’aventures, faciéndonos nun tener mui claro si tábemos énte una película del estilu d’Ocean’s Eleven o d’Indiana Jones. De fechu, el direutor Rawson Marshall Thurber dixo de facer les dos al empar, p’aforrar dineru y tiempu.
Series a esgaya
Tenemos dos trailes nuevos, ún de la versión nueva de la mítica The Fresh Prince of Bel-Air que fizo famosu a Will Smith, agora con un tonu dramáticu enforma chocante (podéis velu equí) y otru d’una serie de zombis coreana, basada un manhwa, que saquen col nome internacional All of Us Are Dead (que podéis ver equí). La primera tovía nun tien fecha nin canal d’estrena n’España, pero pa la segunda namás qu’hai qu’esperar al día ventiocho d’esti mes pa que salga en Netflix. D’otra miente, Real Steel, la película de Dreamworks que protagonizaba Hugh Jackman (y basada nun rellatu de Richard Matheson) va tener serie en Disney +, anque tovía nun sabemos si va ser una continuación de la película o un reiniciu de la hestoria. Por si nun la vistis, ye sobre engarriaes profesionales ente robós nun futuru cercanu, siendo’l protagonista un “entrenador” con un robó reguleru.
