Vuelven les series de los noventa:
Esta selmana lléguennos noticies sobre dos series que van reiniciar. Una ye sobre la nomada serie de noveles d’horror pa neños, Goosebumps de R. L. Stine, que yá tevo una serie nos noventa y un par de películes apocayá. Sabemos que la producción cuerre a cargu de Sony y Scholastic Entertainment, el direutor va ser el mesmu que’l de les películes, y que cuenten que’l presupuestu que manexen va ser ablucante. La otra ye Early Edition, que cuasique vos sonará menos pero foi mui popular los noventa. Trataba d’un puntu al que toles mañanes lu esperaben na puerta un gatu y un periódicu… cola peculiaridá de que’l periódicu yera’l del día siguiente. Tomando esti como guía, el personaxe facíase cargu d’iguar los socesos tráxicos primero de qu’ocurrieren. Pel momentu sabemos que la CBS tien encargáu’l episodiu pilotu y que la protagonista de la serie nueva va ser una muyer, pero non si va facer de secuela o reiniciu de l’anterior.
Trailes de películes que vienen:
Una de les películes más esperaes ye Jurassic World: Dominion, la tercer parte del reiniciu de la franquicia de Jurassic Park y que trai con ella los personaxes principales de la saga orixinal. Por fin tenemos traile, acabante salir del fornu (van estrenala en xunu) y si quies velu tiéneslu equí. Masque pasó más desapercibida, tamién tenemos traile de Firestarter, una adautación nueva de la obra homónima de Stephen King. La orixinal ye nada menos que de 1984, con Drew Barrymore como neña piroquinética, y sacáron-y una continuación a principios de los 2000’s. Na nueva la neña ye Ryan Keira Armstrong (Anne With an E.) y cuenta tamién con Zac Efron. Ah, meca, nun diximos que sal en mayu, y el traile pues velu equí.
Bioshock, del videoxuegu al cine:
Tres d’años falando d’ello, por fin vamos tener una película qu’adaute la famosa saga de videoxuegos. Pel momentu namás que sabemos que Netflix ye la empresa que se fizo colos drechos, pero más nada. Por supuestu, vamos contavos más en cuantes que lo sepamos.
