Boicó de les grandes productores a Rusia:
Hasta nesti informativu hemos falar de la guerra d’Ucraína, y ye que les mayores productores cinematográfiques, Disney, Universal, Warner y Paramount, decidieron xunise al boicó a Rusia y nun estrenar nos sos cines les películes vinientes. Esto afeuta, yá de mano, a The Batman, y si la cosa dura, que tien tola pinta, a otres como Morbius, Sonic 2, Jurassic World: Dominion, The Secrets of Dumbledore o Doctor Strange in the Multiverse of Madness. Netlfix tamién s’apunta y anuncia que nun va cumplir la nueva llei audiovisual rusa, lo que sacaría la canal del país.
Vienen cosines de mieu:
La productora d’Álex de la Iglesia y Carolina Bang ta en sacar una serie de cinco películes d’horror, The Fear Collection, col sofitu de Sony Pictures y Amazon Prime. Yá tenemos traile de la primera, Veneciafrenia, una d’asesín en serie na que, polo que paez, hai un venecianu que ta demasiao en contra del turismu masificáu. Podéis velu calcando equí. Tamién ta película nueva de Jordan Peele, cuasique’l mayor representante del llamáu “horror eleváu” (obres que, digamos, nun son sobre escamuchines a lo xole, sinón que tienen dalgún tipu de mensaxe). Asina, a obres suyes como Get Out, Us o la Candyman nueva xúnese Nope, una d’estraterrestres. Tamién podéis ver el traile calcando equí.
Otra vuelta de Futurama:
La serie animada de Matt Groening tuvo yá cuatro temporaes en Fox y, un tiempu dempués, volvió en Comedy Central pa otres dos. Agora vuelve de nueves pa Hulu, y anuncien que van tener pelo menos una temporada de venti episodios nuevos. Esperen estrenala pa 2023, y anque-yos costó consiguir que John DiMaggio volviera a facer de Bender, yá confirmaron que van tener toles voces orixinales.
