Primer güeyada a la serie nueva de Marvel:
Agora tamos cola estrena de Moon Knight, pero Marvel yá quier meter ganes de ver la serie viniente, Ms. Marvel. Esta trata d’una rapaza musulmana qu’almira a la Capitana Marvel y un día consigue superpoderes, colo que sigue los pasos de la so heroína. Si queréis ver el primer traile tenéislo calcando equí.
Otra serie de Walker:
Acabante d’estrenar la versión nueva de Walker Texas Ranger, con Jared Padalecki adunviando al míticu Chuck Norris, agora anuncien una serie nueva de la franquicia, esta ambientada en sieglu XIX y protagonizada por Katherine McNamara (Arrow) nel papel d’Abby, una moza de clas alta que quier vengar al maríu asesináu. Esta pondera de la franquicia tien como nome Walker: Independence.
Más noticies de Madame Web:
Sony sigue trabayando en películes de personaxes secundarios de Spider-Man (pos tien los drechos pa facer películes de la franquicia, pero llegó a un alcuerdu con Marvel pa qu’esta quede col personaxe principal). Amás de les yá estrenaes de Venom, la a puntu de sacar del vampiru Morbius y la que tán preparando de Kraven el Cazador, lleven un tiempu falando d’una de Madame Web, una aldovina discapacitada. Yá sabíemos que d’esta diba facer Dakota Johnson (Fifty Shades of Grey), pero agora anuncien que s’apunta como coprotagonista Sidney Sweeney (Euphoria). Tovía nun se sabe en qué papel, pero les redes bullen con rumores de que podría ser una heroína pa la que podríen tar preparando otra película: Ghost-Spider, Black Cat o Arachne.
