Películes que vienen:
Anuncien una continuacion de la película qu’enfrentaba los dos monstruos clásicos, Godzilla vs. Kong, lo que tamién yera d’esperar porque resultó tou un ésitu metá l’andanciu. Y si nun tenéis bichos xigantes abondos con ello nun pasa nada, porque tamién tán tresnando una película de Voltrón, el robotón de los dibuxos de los ochenta. Per otru llau y yá nun procesu más avanzáu ta’l proyeutu que va trayer de vuelta Eraser, la película de Schwarzenegger sobre un axente de proteición de testigos. El protagonista nuevu ye l’actor Dominic Sherwood (Shadowhunters, Don’t Sleep) y acaben de sacar un traile. Les primeres reaiciones nun son mui positives, pero podéis xulgalu vós mesmos calcando equí.
Rumores marvelinos:
Tres de la reapaición del Daredevil de Netflix na película última de Spider-Man, agora paez ser que Marvel anda en trayer la serie de vuelta con una productora creada específicamente pa ella, Blind Faith Productions. Ye información que vien de páxines ue yá delantraren noticies verdaderes n’otres ocasiones, pero tovía nun hai nada onfirmao. Per otru llau, Production Weekly añade a los sos datos la esistencia d’una serie de televisión de Marvel ambientada n’espaciu, y les últimes noticies apunten a que’l protagonista va ser Nova, l’axente na Tierra de la policía cósmica que yá se viera en Guardians of the Galaxy.
¿Va ser Hugh Grant el Doctor?:
L’actor ñega que va ser el protagonista nuevu de Doctor Who, pero los rumores son cada vuelta mayores y siempre guarden con munchu procuru la sorpresa. Los cástings son en llugares secretos y los actores roblen contratos de que nun van dicir nada a naide hasta llegar el momentu precisu. El casu ye que cuenten que la productora quier un golpe d’efeutu pa la serie del viaxeru temporal, que yá tien cuasi cuarenta temporaes, y aumentar el presupuestu pa da-y un “enfoque Marvel” y sacar delles ponderes con personaxes secundarios. D’esta miente, el fichaxe del actor casa bien colo que busquen.
