Precuela d’It:
Una de les obres más nomaes de Stephen King, en teniendo tantu ésitu l’adautación nueva al cine, va tener una serie asitiada nel pasáu de la ciudá ficticia de Derry. Cuenten que va ambientase en dalgún de los anteriores ciclos nos que, cada ventisiete años, el payasu monstruosu ataca de nueves, conque lo más seguro ye que cuente l’orixe d’esti. El nome, pelo menos provisional, ye Welcome to Derry, y la productora responsable, y por ello la canal onde van estrenala, ye HBO Max.
Vuelven los Spy Kids:
La saga de neños espíes creada por Robert Rodríguez vuelve a la carga en manes del mesmu Rodríguez y de Netflix, que busquen actualizar la franquicia pa llegar al públicu infantil d’anguaño. Ente 2001 y 2011 sacaron cuatro películes con actores como Antonio Banderas o Jessica Alba, y nelles salió Danny Trejo faciendo’l papel de Machete, que dempués tuvo dos películes propies.
Otres cosuques:
La serie basada na saga de videoxuegos Fallout de la que falábemos va unes selmanes (equí) yá tien una protagonista, y ye l’actriz qu’apocayá vimos en Yellowjackets, Ella Purnell. Tamién tenemos noticies de la serie nueva de CW, Gotham Knights, na que los afiaos de Bruce Wayne van formar equipu con dellos villanos en morriendo l’home-esperteyu. L’otru día anunciaben a Misha Collins (Supernatural) como Dos Cares, y agora a Anna Lore (Katie) como la heroína Spoiler. Ah, sí, y tamién tenemos por fin una fecha pa la estrena de la pondera de Game of Thrones, House of the Dragon. Van sacala n’HBO Max yá n’agostu.
