Serie de Dungeons & Dragons:
L’otru día comentábemos que ficharen a Chris Pine como protagonista de la película nueva de basada nel nomáu D&D, y agora enterámonos de que tán planiando aínda más coses. Paez ser qu’una d’elles va ser una serie de televisión, anque entá nun se sabe más nada; abulta que quieren aprovechar les posibilidaes cuasi inacabables de la franquicia, pos puen basase nes abondes noveles y videoxuegos arriendes de los suplementos al xuegu rol p’allugar les partíes n’abondos mundos estremaos.
Bat-rumores:
Cunten que HBO Max ta trabayando nuna torna de la clásica serie animada de Batman, aquella que nos namoró nos noventa con hestories de gran calidá y na que’l mesmísimu Mark Hamill ponía la voz al Joker. Per otru llau, el so creador, Bruce Timm, diz que sedría bon momentu pa una película d’aición real de la serie que-y siguió, Batman Beyond, sobre un mocín del futuru al qu’un vieyu Bruce Wayne depriende l’oficiu superhéroe. Veremos en qué queda.
Fear Street:
Amás de les nomaes Goosebumps, R. L. Stine escribió otres munches series de noveles, y una d’estes foi la perestensa Fear Street. Los drechos taben en manes de Disney, y como nun concasen cola so política de producir namás obres afayadices pa toles edaes (los llibros taben dirixíos a llectores dalgo más mayores que Goosebumps) decidieron vende-ylos a Netflix. Estos tienen pensao facer trés películes, venceyaes pero caúna allugada nuna época distinta: una sedrá en 1994 (cuando unos rapazos se decaten de qu’asocede daqué dende va sieglos), otra en 1978 (con un aire a Vienres 13) y otra en 1666 (con caza bruxes incluyida).
Más películes del Ensin-Spiderversu:
Cada poco anuncien que Sony anda trabayando en proyeutos nuevos del so pecuñar universu de superhéroes. Por si nun lo sabéis, Sony tien los drechos cinematográficos de tolos personaxes de Spider-Man, al empar qu’un contratu con Marvel que-yos devuelve l’héroe a cambéu de parte les perres. En resultancies, y p’aprovechar dafechu la llicencia, miren de construyir un universu propiu namás a partir de películes de los personaxes secundarios. Venom ye la única qu’estrenaron pel momentu, magar que ceo tendremos la segunda parte y el Morbius de Jared Leto. Agora, a los milenta proyeutos de los que se fala que van facer, súmense Stunner (d’una muyer obesa que guía a control remotu un robó superfuerte y que ta too bollu) y Dusk (d’una gótica con ropa salío del infiernu, que-y permite teletresportase y remanar les solombres). Sicasí, hai dicir qu’estos proyeutos entovía son como l’agua nuna cesta, y nun sedría la primer vuelta na qu’acaben en nada.
