Netflix en Problemes:
La guerra de les canales de streaming arrecia y tamos énte la primer vez na historia na que Netflix pierde soscriptores, doscientos mil en trés meses, conque la direición ta poniéndose nerviosa y anunciando cambeos qu’abulten pensaos un poco a lo xole. Dicen que van impidir daveres que se puea compartir cuenta, que tán pensando en sacar una soscripción más barata na qu’has comer anuncios, que pueque saquen menos conteníu y con un capítulu cada selmana en cuenta de tola temporada de golpe… La verdá, paez que son midíes pa espantar más que p’atrayer. Veremos como sigue la cosa.
Vuelven clásicos d’horror:
La productora Lionsgate tien ente manes los drechos de lo que yá son dos sagues clásiques de los noventa: la del malváu duendu irlandés Leprechaun (siete películes, amás d’otra que poco más tien en común que’l nome) y la de “metraxe atopáu” The Blair Witch Project (trés películes). Bono, pos anque tovía nun hai noticies sobre los equipos que van siguir les sagues, sí sabemos que la compaña ta interesada en facer una película nueva de caúna.
Novedaes sobre la película de Dungeons & Dragons:
Les noticies sobre esta película van pasu ente pasu y llevamos un tiempu informando d’elles. Por poner, de qu’ente los actores van tar Hugh Grant, Michelle Rodríguez, Chris Pine, Sophia Lillis y Justice Smith, y que la estrena ta planiada pa marzu del añu qu’entra. Agora tamién sabemos el títulu, Dungeons & Dragons: Honor Among Thieves, lo que paez escartar que tea basada en nenguna novela en concreto porque nun hai nenguna que se llame asina. Eso sí, tovía nun ta escartao que tenga asemeyos cola serie de dibuxos, o ambientada en dalgún de los munchos mundos yá conocíos de la franquicia.
