Cosuques que vienen:
Tres tantos años, paez que por fin va salir la segunda parte d’Avatar, Avatar: the Way of Water, pos la estrena ta datada p’avientu y anuncien que les primeres imáxenes van poneles nos anuncios de Doctor Strange in the Multiverse of Madness. Per otru llau, en 2023 vamos tener una entrega nueva de la saga d’horror A Quiet Place, que tien tola pinta de ser precuela porque ye va llamase A Quiet Place: Day One. Nel mundu de les series, anuncien una continuación de la comedia That 70’s Show que va llamase That 90’s Show, y anque yá tienen confirmao que van salir los actores de la orixinal Topher Grace y Laura Prepon, tovía nun se sabe si van apaecer los más famosos Ahston Kutcher o Mila Kunis. Tamién anuncien una serie de Casper, la pantasmina de dibuxos que tuvo una película nos años noventa, pero d’esa nun sabemos muncho tanina.
Editorial nueva de cómics:
El nomáu Frank Miller, autor d’obres como Batman: Year One, 300, Sin City o Ronin, crea col autor y editor Dan Didio la editorial nueva Frank Miller Presents. Nella quieren, en parte, presentar obres del autor, que yá tuvo dellos problemes con otres editoriales polo polémiques que son de xemes en cuando (nun-y dexaron facer un cómic de Batman contra Al Qaeda y presentólu con otru personaxe de la so creación en Holy Terror). Pero tamién falen d’asoleyar obres d’autores nuevos, conque seguro que salen coses interesantes.
