Habemus Doctor:
Magar los munchos rumores sobre’l protagonista nuevu de Doctor Who, la mítica serie británica de ciencia ficción, nengún d’ellos acertó. L’actor que va facer del estraterrestre viaxeru nel tiempu va ser, a partir de la temporada viniente, Ncuti Gatwa, famosu sobre manera pol papel d’amigu’l protagonista na serie de Netflix Sex Education. A ello va xunida la vuelta del showrunner Russell T. Davies, que nos dio grandes episodios en pasáu. La mala noticia ye que nun planien que salgan episodios d’esti Doctor nuevu hasta payares de 2023.
Anuncies y avances de lo que vien:
Por fin podemos echar una primer güeyada a la nun se sabe mui bien si esperada continuación d’Avatar, que lleven años y años anunciando y nunca nun acababa de llegar. La estrena ta fechada p’avientu, y podéis ver el vidéu calcando equí. Tamién ta acabante salir del fornu un avance de la cuarta temporada de Westworld, que tenéis tamién equí. Per otru llau, l’ésitu de la película nueva de Scream fai qu’anuncien yá tar preparando una sesta parte, na que repetiría la fornada nueva d’actores de la última. Y Sam Raimi, qu’acaba d’estrenar Doctor Strange and the Multiverse of Madness, ta preparando la vuelta de Darkman, un entemez de superhéroe y pantasma de la ópera que creó nos años noventa y al que na primer película dio vida Liam Neeson.
