Tenemos noticies calentines, y ye que tán anunciando la vuelta d’unos cuantos clásicos modernos.
El primeru, una película nueva de la saga The Hunger Games, la precuela The Ballad of Songbirds and Snakes basada nel llibru del mesmu nome, y con un mozu Coriolanus Snow de protagonista. Tovía queda un tiempu, nun va salir hasta payares de 2023, pero yá empiecen a meter ganes con un avance que pues ver calcando equí.
Per otru llau, y muncho más cerca (queden un par de selmanes) tenemos la vuelta de Beavis y Butthead, la pareya de manguanes que se ficieron tan populares nos noventa, primero como presentadores de videoclips y llueu por una serie y hasta una película propia. Vuelven n’otra película en streaming pa Paramount +, y tamién pues ver l’anunciu calcando equí. Tamién tenemos avances d’un par de series de les que yá falemos como son la de la fía de los Addams, Wednesday (equí) y la qu’adauta los cómics de Sandman (equí).
Ah, y yá no postrero, pero non menos importante, Neill Blomkamp diz que ta trabayando na continuación de la película de ciencia-ficción District 9, aquella na qu’unos inseutos estraterrestres viven nun guetu. Ye una pena, pero d’esta nun tenemos nada qu’enseñavos de momentu.
