¿Serie nel mundu Harry Potter?:

Va unos díes corrió nes redes el rumor de qu’anden tresnando una serie pa HBO asitiada en mundu máxicu de J. K. Rowling. Warner y HBO niéguenlo, pero nun ye raro que se faiga tala cosa cuando entovía tán empecipiando un proyeutu. Veremos aú va la cosa, nun ye que nun tengan aspeutos d’aquel mundu por esplorar.
Película del viax de Drácula:

Anuncien una película, Last Voyage of the Demeter, basada nel capítulu de Drácula nel que’l vampiru viaxa en barcu a Inlaterra. Como la novela nun cunta muncho no tocántenes a qué asocedió, que toos acaben muertos y poco más, nun ye la primer vez que se fai una obra sobre ello. Por casu ta’l segundu capítulu de la miniserie de Netflix, o tamién una esparatada novela llamada Dracula versus Great White Shark. Yá va lo menos diez años que queríen facer esta película, y abulta que por fin va p’alantre.
Dibuxos de Tomb Raider y Skull Island:

Netflix anuncia que va sacar una serie de dibuxos animaos de caúna d’estes franquicies. La de Lara Croft siguirá la continuidá de los videoxuegos nuevos, y va guionizala y producila l’encargáu de The Witcher: Blood Origin. La de King Kong, pela so parte, sigue la continuidá de la película de 2017 (que ye la mesma que la de Godzilla vs. Kong) y va dir d’unos puntos qu’acaben na islla infestada de monstruos cuando se-yos funde’l barcu.
Heroes Reborn:

En 1996 Marvel reinició les hestories de Los Vengadores y Los Cuatro Fantásticos con autores mui de moda, queriendo da-yos puxu porque daquella andaben zancatrás. Un añu dempués tornaron al universu y la continuidá de siempres, pero agora, pol ventenu quintu aniversariu, anuncien mui sonoramente una hestoria col mesmu nome que sirve como homenax a aquella. Paez ser qu’esta nueva va presentar un mundu nel que nin unos nin otros foron nunca superhéroes, los principales defensores de la tierra son l’Escuadrón Supremu (una “versión” de Marvel de la Lliga de la Xusticia de DC) y namás Blade el cazavampiros sabe que les coses nun son como tendríen de ser. Nes imaxes promocionales podemos ver que lo menos dos de Los Cuatro Fantásticos son axentes de SHIELD, y que Peter Parker ye un fotógrafu vulgar (que saca semeyes a Hiperion talamente como Jimmy Olsen a Superman).
Tenéis un traile equí.