Monstruos xigantes a esgaya:

En boletín anterior falábemos de que va salir una serie de dibuxos de King Kong asitiada nel universu que comparte con Godzilla. Paez que los kaiju (como llamen los monstruos xigantes en Xapón) tán mui de moda, porque anuncien tamién un anime nuevu de Godzilla pa Netflix (Godzilla Singular Point, col traile equí), el de Pacific Rim yá ta pa salir (tamién hai traile) y Guillermo del Toro (que, recordemos, dirixó la primer película de Pacific Rim) dixo l’otru día que-y prestaría un alcontronazu ente los robós d’esta con Kong y Zilla. Teniendo en cuenta que les trés franquicies tán en manes de Legendary, nun sedría raro qu’acabe asocediendo.

Amás, y por si esto fora poco, va unos díes salió por sorpresa un traile de la torna d’Ultraman, un superhéroe xigante qu’anque nun ye mui conocíu pequí (echaron dalguna serie en La 2 va como trenta años), en Xapón ye tou un fenómenu que cute la badana a monstruos dende va más de cincuenta años. Ah, y los encargaos de la película que lu traye de nueves son nada menos que los creadores d’Evangelion.

Ente unes coses y otres, paez que les películes de monstruos van ser a competir en cuota mercáu coles de superhéroes.

Buck Rogers:

Igual a munchos nun vos suena Buck Rogers, pero ye ún de los primeros personaxes de la space opera, creáu cuasi mediu sieglu primero de qu’estrenaren Star Wars. Agora, tamién pa Legendary (la productora vien fuerte), George Clooney ta preparando un rellance la franquicia que, dicen, él mesmu va protagonizar.

Pa quien nun lo sepa, Buck Rogers ye un veteranu guerra pedregués al qu’un día-y duerme un gas raro d’una mina, y cuando espierta atópase con que’l pigacín qu’echó duró cuatrocientos años. En futuru descubre qu’unos tiranos gobiernen los Estaos Xuníos, faise con una mochila voladora y una pistola rayos láser y, ensin aparar muncho a pensar cómo, ponse a partir cares.

Anovamientos de series de CW:

Abulta que la canal confía no qu’anda faciendo, porque anuncia qu’anueva un cientu series cuando delles nun tienen demasiada audiencia y hai otres de les que nin siquiera estrenaron la temporada 2020-2021. Toos a los que-yos preste All-American, Batwoman, Charmed, Legends of Tomorrow, Dinasty, The Flash, In the Dark, Legacies, Nancy Drew, Riverdale o Roswell tán de norabona, porque entá-yos queden episodios pa un bon cachu. Tamién allarguen les primeres temporaes de Walker y Superman & Lois, y recordamos que queda poco pa qu’estrenen Kung Fu (una versión nueva de la serie clásica) y The Republic of Sarah (sobre lo qu’ocurre nun pueblu estaoxunidense cuando s’enteren de que viven sobre una mina enorme de coltán).

Leave a Reply

La to direición de corréu nun va espublizase. Los campos riquíos márquense con *