Despidu de Gina Carano
Paez ser que Disney tenía abondo planiao pal personax de Cara Dune, secundaria en The Mandalorian y de la que yá anunciaben que diba tener un papel principal nuna serie nueva, Rangers of the New Republic. Por embargu, dempués de que l’actriz Gina Carano compartiera un montonáu de comentarios polémicos nes redes sociales (negándose a poner fociquera, sofitando l’asaltu al Capitoliu o comparando la situación de los republicanos nos Estaos Xuníos cola de los xudíos na Alemania nazi), la compaña acaba decidir prescindir pa siempres d’ella. Queda por ver qué pasa col personax, si desapaez ensin esplicación, faen daqué como qu’arreviente una nave y digan que diba nella o lu interpreta otra actriz. Hai una campaña en Twitter pa que la adunvie Lucy Lawless, perconocida pol papel de Xena.
Series nueves en CW:
En boletín anterior falábemos de toles series que la canal CW anueva pa otra temporada, y nesti de los episodios de prueba de series nueves qu’encargaron. Una, el rellance de les Powerpuff Girls, agora como serie d’aición real y coles neñes yá crecíes y sintiéndose xuguetes rotos.Otra, Naomi, sedría parte del universu en comuña de les series de DC que nun dexa de medrar, y protagonizaríala un personax acabante de crear nos cómics, una moza d’otru universu que tien de protexer esti. Tamién anuncien una versión nueva de The 4400, aquella serie de los 00’s sobre cuatro mil cuatrocientes persones llevaes polos estraterrestres y qu’un día vuelven d’esmenu.
¿Serie de Jimmy Woo?
Wandavisión ta siendo tou un ésitu y, va unos díes, el direutor y actor Stephen Ford pidió en redes sociales una serie sobre ún de los sos personaxes secundarios, l’axente del FBI Jimmy Woo (que yá viéramos n’Ant-Man). Esta trataría, cuntaba, d’una especie de X-Files en tonu humorísticu na que Woo tropezaría los casos más estraños del Universu Marvel. En viendo l’ésitu la so propuesta, unvióla formalmente a Disney+, pa ver si asina consigue’l trabayu. L’actor, Randall Park, amuésase dispuestu a protagonizar una serie Marvel, asina como Kat Dennings (l’actriz que da vida a Darcy) a salir nella, polo que yá ye namás cosa de los d’enriba que’l proyeutu se faiga realidá.
Más cuélebres y mazmorres:
Paez que nun hai selmana na que nun tengamos de falar de Dungeons & Dragons, y ye qu’abulta que por fin tan entainando a realizar los munchos proyeutos. Al repartu de la película súmense agora, arriendes de Chris Pine, Michelle Rodriguez (Fast & Furious, Machete) y Justice Smith (Detective Pikachu, Jurassic World 2). Siguiremos informando.
