Esta última fin de selmana prodúxose la convención biañal de Disney, y ello siempre va xuncío a un montonáu de novedaes. Conque darréu, ensin atrasanos con presentaciones, vamos con elles.
Pixar:
Per parte d’esti estudiu d’animación tenemos l’anunciu d’una segunda parte d’Inside Out, na que vamos ver qué pasa coles emociones de la rapaza cuando algama l’adolescencia. Y, tamién pa 2024, van sacar Elio, una película sobre un ñeñu al qu’unos estraterrestres confunden col embaxador de la Tierra. Más cerca, pa 2023, tenemos Elemental, sobre un mundu nel que conviven persones de los cuatro elementos y de dalguna manera coneuten un mozu d’agua y una moza de fueu, y una serie, Win or Lose, sobre un equipu de béisbol. Ye una pena, pero tovía nun podemos enllazavos un avance de nada, porque nun los presentaron. ¡Pero tranquilu tol mundu, que tovía queda boletín!
Walt Disney Pictures:
Yá llevamos unos años que ta de moda facer versiones n’aición real de los clásicos Disney, y hai una riestra d’elles esperando na fila. Tenemos yá un avance de The Little Mermaid que podéis ver equí, y que produxo en redes el yá típicu baruyu qu’hai cada vegada que cambien un personaxe d’etnia. Anuncien, tamién, una precuela de The Lion King, Mufasa, y que tán preparando otres versiones de Snowhite y de Peter Pan. Per otru llau, tenemos yá cerca continuaciones de dos clásicos que vuelven dempués d’abondos años, como ye’l casu Enchanted, agora Disenchanted, sobre una princesa de cuentu qu’acaba nel mundu real (segunda parte que tien un avance que pues ver equí). Y tamién ta Hocus Pocus 2, la continuación del clásicu de los noventa de les trés bruxes malvaes (y que tamién pues ver qué pinta tien con un avance nuevu que t’enllazamos equí).
Marvel Studios:
Per parte de Marvel yá tenemos un calendariu apretáu de novedaes qu’anuncien con abonda antelación, pero lléguennos como que la película de The Fantastic Four (la primer versión dientro del Universu Cinemáticu Marvel) va salir en payares de 2024, y qu’unos meses enantes vamos tener una película del grupu d’héroes/villanos Thunderbolts, con una formación que, como podéis ver na imaxe, vien sobre manera de la película de Black Widow y la serie de The Falcon and the Winter Soldier No que son avances, déxennos ún del especial de Werewolf by Night, que paez que va trayer al universu cinemáticu la parte más espantible del Universu Marvel (estremándose otros personaxes como Man-Thing), y que como siempre pues ver calcando equí, y otru de la serie de Secret Invasion (equí) na que Nick Fury ha facer frente a una infiltración estraterrestre, y na que tendremos a Emilia Clarke nel papel d’Abigail Brand, la direutora de SWORD (digamos, el SHIELD del espaciu).
Lucasfilms:
Ta saliéndonos un boletín especialmente llargu, pero ye lo que tienen tantes novedaes. Un sorpresón ye una serie nueva d’animación de Star Wars, Tales of the Jedi, que va mostrar hestories de la orde a lo llargo de les dómines (equí l’avance) y que va salir yá n’ochobre. Podemos tamién echar una primer güeyada a la tercer temporada de The Mandalorian calcando equí, anque dalgunos sintiéronse deceicionaos por nun saber más d’otras series como Ashoka o la segunda temporada de The Book of Bobba Fett. Ah, y si punximos “Lucasfilms” y non “Star Wars” a esti apartáu ye porque tamién contaron qu’Indiana Jones 5 va per bon camín, y ta planiáu que s’estrene en xunu de 2023.
