Nos díes caberos sliero tantes noticies sobre películes y series d’horror que decidimos facer un especial del nuesu friquismu selmanal dedicáu namás qu’a elles. Asina qu’ehí vamos:
Hocus Pocus 2:
Val, ye una película dirixida más bien al públicu infantil, pero los neños tamién tienen drechu a pasar mieu… y de xuru qu’habrá más d’un adultu naguando por ver la segunda parte d’esti clásicu de bruxes, porque se fizo de rogar nada menos que trés décades. Van estrenala direuta pa Disney +, el trenta de setiembre, y la verdá que’l traile ta causando sensación. Si queréis podéis velu calcando equí.
Prey:
Yá falemos en dalguna ocasión d’esta película de la saga Predator, y ye que lleven tiempu frayándonos a noticies con ella. Sicasí, mentámosla otra vuelta porque yá ta pa estrenase, el cinco d’agostu en Hulu (queda por ver ónde n’España). Quien s’enfrenta al cazador estraterrestre nesta ocasión ye una comanche del sieglu XVIII, y el direutor aseguró va unos díes que va ser la película que más mieu meta de toes les de la saga. L’avance d’esta lleva un tiempu yá nes redes, pero si tovía nun lo vistis tenéislu equí.
Pretty Little Liars: Original Sin:
Más cerca tovía tenemos la estrena d’esta serie (ventiocho de xunetu) que, anque s’anuncia como una pondera de Pretty Little Liars, de momentu nun paez tener rellación dala. L’argumentu, qu’un puntu va andar asediando a unes moces por dalgo que ficieron los sos padres va más de venti años, colo que paez que van xugar a la narrativa en dos tiempos y, yá de pasu, da-y un aire a película de mieu de les de finales de los noventa y principios de los dosmil. Por supuestu, apurrímosvos tamién un traile, calcando equí.
Y otres cosuques en fornu:
D’esto yá nun podemos avanzavos videos porque nun los hai, pero tamién tenemos cartelu oficial de la segunda temporada de l’antoloxía American Horror Stories, que s’estrena’l día 27 d’esti mes (n’España, previsiblemente, en Disney +) y va tener una temporada un pocoñín más llarga, pola mor del ésitu de la primer temporada l’añu pasáu. Tamién lleguen noticies de qu’Eleven, la productora de Sex Education, ta trabayando nuna serie d’horror pa Netflix, y que va tratar d’una app que t’obliga a facer coses que nun quieres… y a la que más te val face-y casu.
