Diecisiete de marzu, día del cómic y el tebéu:
El Gobiernu d’España declara qu’a partir d’agora va celebrase’l Día del Cómic y del Tebéu el diecisiete de marzu, fecha na que salió’l primer númberu de la revista TBO. ¿Y cuáles son les diferencies ente cómic y tebéu? La verdá ye que nun lo sabemos, pero tenemos a los nuesos espertos trabayando en descubrilo ¡Esperemos que les conclusiones nun seyan que fai falta un día más pal manga y otru pa la novela gráfica! L’oxetivu, dicen, ye visibilizar y promoncionar la industria española per aciu la collaboración de medios de comunicación, redes sociales, entidaes provaes y sociedá civil.
Llinia de manga en catalán:
Nun ye una rareza que salgan cómics en catalán, quiciabes en parte porque les más de les editoriales españoles tán fincaes pehí. Un exemplu de vieyo ye Dragonball, y va unos meses, por poner, salió una edición de Watchmen. Por embargu, agora Norma Editorial anuncia una llinia entera pa ello. Ye una llinia de manga qu’empieza yá mesmo cola aclamada (y dalgo polémica) Tokyo Revengers, y preparen tamién pa esti mesmu añu Guardians de la nit, Jujutsu Kaisen y Chainsaw Man. Tamién, escapóse-yos, pal añu qu’entra van sacar Death Note. Esta ye una noticia estupenda pa les llingües amenorgaes n’España, y dende Refuelgu deseámos-yos ésitu cola iniciativa (a ver si, nuna d’estes, prueben con otres llingües de per equí, como podría ser l’asturianu).
La fin de Conan en Marvel:
Tres l’espublizamientu esti mes de King Conan #6 (el seis de xunetu) y Savage Avengers #3 (el trece) Conan termina la so segunda etapa en Marvel, que foi bien curtia porque empezó en 2019. Eso sí, tiénenla bien aprovechao, porque, arriendes d’una serie propia, Conan quedara desasitiáu del so tiempu y convirtiérase nun Vengador. Agora la llicencia pasa a Titan Comics, como les de tolos personaxes de Robert E. Howard, que tovía nun tán llibres de drechos nos Estaos Xuníos. Asina, falen de que Titan tamién va sacar series d’otros personaxes del autor como Solomon Kane o Dark Agnes.
