Mortal Kombat Onslaught:
Magar qu’Ed Boon xurara y perxurara que nun diben aprovechar el trentenu aniversariu de la franquicia pa presentar un xuegu nuevu, esto a la final ye solo en parte, y ye que, masque nun anunciaron l’esperáu Mortal Kombat 12, sí nos sorprienden cola noticia de que van sacar un xuegu de rol pa smartphones. D’él sabemos, de momentu, que la mecánica va consistir en formar un equipu de personaxes pa enfrentase a otros, no que podría ser dalgo asemeyao a DC Legends… muncho más brutal, por supuestu.
¿Quién ye Johnny Cage?
El farrucu actor y lluchador nun salió nel remake de Mortal Kombat de 2021, pero sí dieron a entender nél que lu veríemos pronto. Agora, Jessica McNamee, Sonya Blade na película, confirma que d’eso se ta falando, anque paez que naide nun quier dicir quién va facer del personaxe. Peles redes sociales llegó a ruxise que’l papel sedría pa Jean Claude-Van Damme, qu’anque ta yá un poco vieyu nun sedría dafechu un absurdu, pos resulta que’l personaxe ta basáu nél, pero Van Damme namás respondió al bulliciu que-y encantaría interpretalu. Quedamos cola incógnita hasta que salgan más noticies… o rumores.
Siguen les películes d’animación:
Yá son trés les películes d’animación p’adultos que sacaron de la saga nomada Mortal Kombat Legends; estes son: Scorpion’s Revenge, Battle of the Realms y la recién estrenada Snow Blind. Y si cola noticia anterior quedastis coles ganes de ver a Johnny Cage nun vos esmolezáis, porque ye a él a quien dediquen la cuarta entrega. Cage Match, que ye como va llamase,va estrenase en 2023, magar que tovía nun tenemos una data concreta.
