La fía de Blade:
Va unos años Marvel asoleyó la idea, colos dibuxos y too, de presentar a una fía del cazavampiros a la que-y diba dar serie propia. La cosa nun salió alantre, pero’l personaxe debutó por fin nel Free Comic Book Day d’anguaño y agora anúncien-y una coleición, Bloodline: Daughter of Blade, pa febreru de 2023. Escríbela Danny Lore (Stranger Things: Erica the Great o Multiversity: Teen Titans) y dibúxala Karen S. Darboe (Marvel Voices: Legacy).
Acontecimientos Marvel:
Anuncien, tamién, qu’en branu de 2023 va aportar la saga Planet of Symbiotes, na qu’a los yá conocíos como Venom, Carnage y Red Goblin van xunise otros personaxes nuevos con simbionte, y que, polo que paez, va siguir colo qu’asoceda esti avientu na saga de Spider-Man Dark Web. Poco dempués, tamién en branu, va empezar la saga de los X-Men Fall of X, y que tien tola pinta d’acabar col status quo que dura dende 2019, cuando los mutantes fincaron nuna islla viviente y fundando ellí un país propiu.
Anovamientu de la llinia de Superman:
La mítica serie del personaxe, Action Comics, va engordar a partir de xineru pa incluyir trés hestories distintes; una sobre’l Superman orixinal, Clark Kent, otra sobre’l fíu Jon y una tecera sobre Power Girl, prima y tía de los anteriores. Mientres, la serie conocida a seques como Superman va rellanzase en febreru, y la serie protagonizada n’esclusiva pol fíu va terminar pa dar pasu a una serie curtia de seis númberos, Adventures of Superman: Jon Kent, na que va tener d’enfrentase a Ultraman, la versión malina de Superman d’un mundu alternativu.
Series y películes:
Como yá ye normal nes convenciones de cómics, le sproducciones audiovisuales quiten protagonismu a les noticies comiqueres, pero, pola natura del eventu, nós dexámosles pa comentales al final. Salieron avances nuevos, que podéis ver calcando nos títulos, de series como Wednesday Addams, les temporaes nueves de Star Trek: Discovery y Star Trek: Picard y el capítulu final de The Rings of Power.
