Deadpool 3
Ryan Reynolds fizo un vidéu (esti) p’anunciar dalgo que naide nun esperaba, pos yá lo teníen ñegao de va tiempu. Pa la tercer película de Deadpool, el mercenariu charrán, va volver Hugh Jackman pa facer de nueves de Wolverine, lo qu’amás de xuru que va trayer una engarriada ente los dos enforma meyor que la de la espantosa X-Men Origins: Wolverine. El casu ye qu’hubo bastante escepticismu pola mor de que, bono, como dicimos, Hugh Jackman yá dexara claro que se retirara de facer el personaxe, conque sacaron un segundu vidéu (esti d’equí) pa confirmalo y, de pasu, echase unes rises.
Armor Wars
Amunchayá qu’anunciemos serie nueva de Marvel, Armor Wars, que diba siguir la estela de les películes del fináu Iron-Man colos sos secundarios, Don Cheadle (Steve Rhodes/War Machine) a la cabeza, y desendolcando’l personaxe de la nueva heroína armada que va salir en Wakanda Forever, Ironheart. Pos agora hai que contar que yá nun ye serie, convirtiéronla en película, nun sabemos si porque la ven mui potente pa sacala en televisión o si ye pola mor d’un cambéu de planes mayor.
Nosferatu
Robert Eggers, direutor de The Northman, anuncia que yá ta confirmada la so versión del clásicu de vampiros de Murnau, con Bill Skarsgard (el mesmu de The Northman, o de la última de Tarzán) como’l desmuertu y Lily-Rose Depp (que non Anya Taylor-Joy, como paecía ser) como la víctima.
Tarzán
Y falando del rei de los monos, Sony acaba comprar los drechos del personxe y ta yá tresnando una película nueva, anque tovía nun sabemos nada d’ella. Vamos siguir informándovos, por supuestu.
Adiós a la nueva de Star Trek
Ye una pena, pero nun son toles noticies bones. En marchando Matt Shakman pa Fantastic Four, cuando yera l’encargáu de dirixir la película que continuaba’l “universu Kelvin”, nel que Chris Pine y Zachary Quinto dan de nueves vida a Kirk y Spock, Paramount decide cancelar la producción de manera indefinida. La verdá que ye una piedra más sobre la franquicia, porque yá lleven tiempu atrasándola por delles incompatibilidaes d’axenda de los actores.
