Fases Cinco y Seis del Universu Cinematográficu Marvel:
Quic ye lo que más espectación podía crear na San Diego Comic Con y de lo que más novedaes hai, polo que tamién va ser lo primero que vamos ver. Tocántenes a películes, Marvel Studios fecha Ant-Man & Wasp: Quantumania pa febreru de 2023, Guardians of the Galaxy Volume 3 pa mayu, The Marvels pa xunetu, Blade pa payares, Captain America: New World Order pa mayu de 2024 y Thunderbolts pa xunetu del mesmu añu. Esi sedría’l final de la llamada Fase Cinco, y darréu comenzaría la Fase Seis con The Fantastic Four (payares de 2024), Avengers: The Kang Dinasty (mayu de 2025) y Avengers: Secret Wars (payares de 2025). Tamién mostraron un avance de la película viniente, Black Panther: Wakanda Forever, que s’estrena en payares y que va contar cola primer apaición en cine del príncipe atlante Namor, primer superhéroe de Marvel. Pues ver l’avance calcando equí. No respeutive a les series de televisión d’aición real, en 2023 van salir, talamente como s’esperaba, Secret Invasion, Echo, la segunda temporada de Loki y la estrena d’Ironheart. Pa 2024 confírmense los rumores y Charlie Cox va volver a facer del diañu guardián en Daredevil: Born Again. No que son les series d’animación, y amás de la segunda temporada de What If…?, Marvel ta pa sacar una serie del guardián de la galaxa arboreu, I Am Groot, una sobre’l primer añu como superhéroe de Peter Parker, Spider-Man: Freshman Year, la vuelta de la serie de X-Men de los noventa siguiéndola xusto allá onde quedara, X-Men ‘97, y una serie p’adultos basada nos cómics de Marvel Zombies.
Keanu Reeves tamién tien una estaya pa él:
Amás de salir un avance de la cuarta película de John Wick (que pues ver calcando equí), anuncien que’l cómic BRZRKR qu’él co-guionizó (y del que’l semidiós guerreru que lu protagoniza tien un asemeyu a él que nun pue ser casualidá) va tener nada menos que dos adautaciones, una a aición real y otra a animación. La encargada de dambes dos ye la canal en streaming Netflix.
Otros avances:
Tamién tenemos acabantes salir del fornu videos colos que ver coses nueves de lo que nos espera en Shazam! Fury of the Gods (calcando equí), el so antagonista en Black Adam (equí) y la serie d’El señor de los aniellos, The Rings of Power (equí).
