VisionQuest:
Paez que l’ésitu de crítica y públicu de Wandavision lleva a Marvel a saca-y una pondera, pos presentándose en formatu de miniserie resultaría enforma forciao facer una segunda temporada. VisionQuest, serie que va compartir nome con una saga de cómics de West Coast Avengers, tien pinta de compartir tamién con ella pelo menos parte del argumentu, yá que trata la falta d’humanidá de Vision nun estáu mui paecíu (hasta na color blanco) a cómo quedó a la final de la serie madre. Per otru llau, el rumor de que Yahya Abdul-Mateen II va protagonizar una serie del superhéroe Wonder Man apunta a una presentación del personaxe nesta serie, pos los patrones cerebrales orixinales de Vision nel universu comiqueru, los que-y dan alma, son los d’él.
Crystal Lake:
Tres una llarguísima llucha polos drechos de Friday the 13th, Peacock prepara una precuela de la saga d’ún de los asesinos de ficción más nomaos de la historia. Por embargu, siendo una precuela, ye más que probable que se centre en so ma, la tampoco mui cuerda Pamela Voorhees, pero les noticies espublizaes hasta agora apunten a que nun van tener problema pa usar los elementos de toles películes de la saga.
Anovamientos pa temporaes nueves:
Los siguidores de Sandman tán de norabona, pos tres d’un tiempu d’espera qu’abultaba demasiáu llargu acaba d’anunciase que Netflix va sacar una segunda temporada. Sobre la segunda de la criticada Rings of Power, los showrrunners cuenten que van cambiar delles coses al respeutive de la primera, col envís de dir más pa onde quieren los tolkenistes, pero que tampoco van poder facer demasiao porque yá tienen la temporada escrita y anden a grabala.
