Setiembre vien fuerte no que son les series neves qu’estrenen, como yá pudimos ver cola d’El señor de los aniellos. ¿Qué más nos espera esti mes? Vamos echar una güeyada a lo más importante, porque hai estrenes de xéneru que de xuru van ponevos los dientes llargos. ¡A ello!

Cyberpunk, Edgerunners:

Ambientada nel mesmu mundu que’l nomáu (y polémicu) videoxuegu Cyberpunk 2077, llega esti anime d’aición y ciencia-ficción sobre dos rapazos qu’han trabayar como mercenarios pa sobrevivir. Estrénase en Netflix yá mesmo, el trece de setiembre, y va tener diez episodios (anque nun sabemos tovía si ye una serie zarrada o con posibilidá de segunda temporada). Podéis ver un avance calcando equí, pero lo que nun vais poder ye ñegar que tien pintaza.

Andor:

Andor ye la serie nueva d’aición real de Star Wars, un bilortu de la película Rogue One que, como nun podía ser d’otra manera, tien como protagonista a Cassian Andor, de nueves interpretáu por Diego Luna. La serie va tar ambientada enantes de la película yá mentada, contándonos cómo se tresformó Andor de lladrón a héroe la rebelión, y va salir un episodiu a la selmana en Disney + a partir del día 21. Si nun lu vistis tovía, podéis ver un avance calcando equí.

Tales of the Walking Dead:

Otru bilortu de la hestoria de zombies más conocida del sieglu XXI, como yá fora Fear the Walking Dead, masque nesti casu alcontrámonos énte una antoloxía na que vamos ver una hestoria distinta en cada episodiu, delles con personaxes que yá conocemos y delles con otros nuevos. Esta serie nueva estrénase’l día 22 n’AMC+ y, cómo non, pues ver un avance calcando equí.

Apagón:

Y yá no nos díes caberos del mes, exautamente a partir del 29, Movistar + va sacar Apagón, una serie española sobre un mundu que queda ensin teunoloxía pola mor d’una tormenta solar. Ta basada nel podcast El gran apagón, y cuéntanos cinco hestories de les que yá pues ver un avance equí. Y amás de too esto, por supuestu, tamién tenemos temporaes nueves de series yá conocíes como Rick and Morty, Fate, The Handmaid’s Tale, La Brea, The Bad Batch o Birdgirl. ¡A pasalo bien!

Leave a Reply

La to direición de corréu nun va espublizase.