Cammbeos na direición de la compaña:
La fusión de Warner Bros. (propietaria de DC) con Discovery ta trayendo abondos cambeos a la estratexa cinematográfica, y mesmamente a la de los cómics. De mano, DC Comics pasa a llamase “DC” a seques, y anque hai quien diz que ye por dexar de ser redundantes (“DC” vien de “Detective Comics”) tamién hai quien tien mieu a qu’ello signifique dexar el novenu arte de llau, o hasta socontratalu a otra editorial. Sicasí, lo que sabemos agora ye esto, que la compaña pierde l’apellíu, mientres que la estaya de cine gana’l de “Studios”, análogamente a Marvel. Y, de la mesma manera qu’esta compaña, preparen un plan de películes a diez años col que revilvar los personaxes más conocíos.
Cancelación de Batgirl:
El primer escándalu qu’infestó les redes esta selmana ye que nun van estrenar, nin en cine nin en streaming, la película de Batgirl que yá teníen acabada. Con Leslie Grace nel papel de la heroína, Michael Keaton de nueves nel de Batman, Brendan Fraser nel de villanu y J.K. Simmons nel de comisariu Gordon, la película costó-yos nada menos que noventa millones de dólares, pero cuenten que les opiniones tres los pases de prueba foron tan espantoses que ye meyor guardala baxo llave y nun la asoleyar nunca.
Continuación de Joker:
Pueque p’atapar un poco’l ruíu producíu pola cancelación de Batgirl, a los pocos díes acaben d’anunciar que, pa ochobre de 2024, va salir una continuación de la esitosa versión de Joker de Scott Phillips y Joaquín Phoenix. Joker: Folie á Deux va ser un musical ambientáu sobre manera nel Asilu Arkham, y que cuenta con Lady Gaga nel papel de Harley Quinn (que nun principiu yera siquiatra del villanu).
