Lleguen los superhéroes “apolíticos”:

Eric July, un youtuber afroamericanu mui conocíu porque, dende una ideoloxía llibertaria, lleva tiempu criticando “l’axenda política” que diz que tán desendolcando les grandes compañes d’entretenimientu, decidió apocayá face-yos frente con cómics “anti-woke”. El casu qu’hai dalgo na sociedá de los Estaos Xuníos que removió, porque l’ésitu ye bien bultable yá enantes d’asoleyar nada. Va unes selmanes sacó una campaña de micromecenalgu, col oxetivu de cien mil dólares pa sacar el primer cómic del “Rippaverse”, y yá lleva recaldaos más de trés millones trescientos mil (quedando, amás, más de cincuenta díes p’acabar la campaña). El primer cómic va tratar del superhéroe llamáu Isom, que promete ser del primer personaxe de munchos, un afroamericanu con superpoderes y un ranchu en Texas, y al que’l pasáu lu llama cuando desapaez un amigu de la familia.

Boicó de los fans a American Horror:

Delles cuentes de fans de les series de Ryan Murphy, American Horror Story (con una hestoria distinta cada temporada) y American Horror Stories (antoloxía con una hestoria distinta cada capítulu), cafiaron pola falta d’anuncios y información qu’esti ta dando sobre la temporada viniente, acusando al creador de dexa-yos a ellos el llabor de face-y promoción de baldre. Por ello, plántense y dicen que nun van siguir con ello, que piesllen. La rempuesta de Ryan Murphy nun foi mui diplomática, y ye que foi bloquialos.

Boicós a esgaya a Marvel:

Nun ye nada nuevo, una organización cristiana pidió’l boicó a la película nueva de Thor, va unes selmanes, por tener conteníu LGTB. Agora otros piden boicó a Wakanda Forever por nun garrar otru actor pa facer de Black Panther tres la muerte de Chadwick Boseman, asegurando que ye un casu de racismu porque ye dalgo que nun fadríen si morriera, por casu, l’actor de Spider-Man. Son estes custiones les qu’ocupen los hashtags, pero hai otres, como la recién quexa de los espertos n’efeutos especiales, que contaron les males condiciones nes que trabayen pa Marvel, o tamién el recién desvelamientu de que por Doctor Strange: In the Multiverse of Madness Benedict Cumberbatch cobró siete millones de dólares mientres qu’Elizabeth Olsen namás dos, paecen pasar más bien inalvertíes nes redes sociales.

Leave a Reply

La to direición de corréu nun va espublizase.