“Tudum” ye l’eventu virtual nel que Netflix anuncia toles novedaes más apetecibles que tien tresnaes pa lo que queda d’añu y pal qu’entra, y en celebrándose esta fin de selmana tenemos munches coses que contate. ¡Vamos a ello!
Enola Holmes 2
Por fin vuelve a la pantalla l’adautación de los llibros que tien a Millie Bobbie Brown como Enola Holmes, moza detective y hermanina de Sherlock (Henry Cavill). Nesta segunda película yá va andar con una axencia de detectives propia, pero va costa-y facese un nome al marxe del hermanu. Sal yá en nada, pal cuatro de payares, y podéis ver l’avance calcando equí.
Pinocchio de Guillermo del Toro:
Últimamente tán coles versiones de Pinocchio que nun aparen, siendo bien de recién la protagonizada por Roberto Benigni y tamién la de Disney de Tom Hanks. La de Guillermo del Toro, eso sí, pinta enforma distinta, porque ye una película fecha en stop motion y que promete una visión más siniestra, como ye lo normal nel direutor. Estrénase p’avientu, y podéis ver l’avance equí.
The Witcher: Blood Origin
La pondera de The Witcher llévanos al pasáu del so mundu pa enseñanos cómo foi’l surdimientu del primer bruxu. Ye una miniserie de cuatro capítulos y estrénase el mesmu día de navidaes (si queréis poder ver un avance curtín calcando equí). Tocántenes a la serie orixinal, ta planiao que podamos siguir esfrutando de les aventures de Geralt de Rivia, cola tercer temporada, pa branu de 2023.
You, cuarta temporada
Pa febreru de 2023 torna’l asediador sicópata más carismáticu y queríu pola audiencia, dempués d’una tercer temporada bien movidina y a la busca d’un empiezu nuevu. Esta, por embargu, va volver a la manera na que lo fizo Stranger Things y que nun convence a tol mundu, en dos tandes pa ver si allarguen la xácara y la repercusión nes redes sociales, asina que nun vamos tener tolos capítulos hasta’l diez de marzu. Pues ver un avance (o, más bien, una presentación de personaxes) calcando equí.
Otres coses, ensin feches concretes
Tamién vamos poder ver en 2023 la tercer temporada del Lupin nuevu y d’Umbrella Academy, la segunda de la pondera de Vikings, Vikings: Valhalla, y tamién de l’adautación de la saga de fantasía Shadow and Bone. Por supuestu, tenéis los avances de toes elles calncando los nomes. Tamién quédanos por falar d’una estrena d’una serie d’horror, The Watcher, que lleva Ryan Murphy (American Horror Story) y protagoniza Naomi Watts. De momentu sabemos que tien l’argumentu típicu de casa nueva, hestoria siniestra, y lo que podemos ver nel avance que tienes equí. Y, pa terminar y arriendes de too esto, espéranos tamién una película d’espíes protagonizada por nada menos que Gal Gadot, que se titula Heart of Stone y que promete tiros y hosties a esgaya. Por supuestu, tenéis un avance equí.
