Tres andar unos años al debalu, la estrena esitosa de Black Adam trai xuncíes un montonáu de noticies tocántenes al universu cinematográgicu de DC. ¿Cuáles? Vamos veles darréu.
James Gunn a los mandos:
El direutor de Guardians of the Galaxy demostró con Marvel lo bien que funcionaba la so fórmula colos superhéroes, y dempués foi en DC onde llevantó la franquicia de Suicide Squad y creó la pondera, en formatu de serie, sobre l’antihéroe Peacemaker. Paez qu’en DC Studios quedaron bien contentos col trabayu que fizo, porque agora acaben de ponelu como cabezaleru (a la xunta del productor Peter Safran) de tolos sos proyeutos pa cine y televisión. Nesta reestructuración que se ta dando dende va un tiempín, y como yá comentemos va unes selmanes, cayeron proyeutos yá terminaos como Batgirl, pero otros como Joker: Folie à Deux paecen siguir ensin problema… xunto a otros nuevos y que nun tienen pinta mala.
Vuelve’l Superman de Cavill:
Henry Cavill va volver como l’home d’aceru, anque, poles primeres imáxenes que podemos ver d’él, con unes traces dalgo distintes a les de les películes escures de Snyder y que recuerden bastante a la versión clásica y más allegre de Christopher Reeve (el mariellu na ese, el ricín cayéndo-y pela frente…). L’actor, a estes, rompió’l silenciu sobre por qué nun salía en más películes de DC, y paez ser que nun-y prestó nada a un pexe gordu que nun quixera facer un caméu en Shazam si nun-y prometíen más proyeutos propios, lo que lu fizo metelu nuna llista negra. Por eso ye agora, con xente nuevo al mandu, que vuelve como Superman.
Otros proyeutos:
Ta falándose, tamién, d’una película de Green Lantern protagonizada por John Stewart, el llámpara verde afroamericanu, una tercer parte de Suicide Squad y d’una segunda del Batman de Reeves (anque nun s’espera hasta 2025). D’esta película, amás, sigue trabayándose na pondera The Penguin, una serie con Colin Farrell repitiendo’l papel del desagradable villanu, y, anque tovía ta mui en pañales, paez ser que n’otra sobre l’asilu Arkham, el siquiátricu de Gotham nel qu’enzarren a tolos enemigos del caballeru escuru. Tamién paez siguir en marcha, masque Cavill vuelva como Superman, una película sobre Val-Zod, el llamáu “Superman Obama” d’un mundu alternativu, y que ta a cargu de J. J. Abrams.
