En 1954 estrenóse Gojira, una película que fadría historia y pasaría a facer parte del imaxinariu coleutivu. Y ye que pa ella, con Honda Ishiro a la direición y Tsuburaya Eiji a los efeutos especiales, crearon el monstruu xaponés más nomáu del mundu. Y anque nun principiu queríen facer un amiestu de gorila y ballena (d’ehí ye d’onde-y vieno’l nome, de xuntar les pallabres “gorira” y “kujira“), al final basáronse na película americana The Beast from 20,000 Fathoms, conque decidieron crear un dinosauriu radioactivu. Y, como nun teníen presupuestu como pa tol tiempu y artesanía que necesita la téunica de stop motion, punxeron a un probe paisanu a pasar calor nun disfraz imposible.
A quien nun vio la película pue paece-y que yera una babayada, una película más de monstruos. Por embargu, basta con ver namás unos minutos pa cambiar d’idea. Y ye que tamos énte una película nacida na posguerra, que trata, como dicíemos, sobre una creatura radioactiva que destruye Xapón, y escontra la que les fuercies armaes xaponeses nun puen facer nada. Les escenes de víctimes firíes, d’edificios destruyíos, remitíen dafechu al estrozu que provocara la guerra, y n’especial les bombes atómiques. La película espeyaba, asina, el dolor y l’humildamientu de la nación.
Ye verdá, tamién, que los neños que vieron la película quedaron embruxilaos col monstruu, y eso fizo que nes abondes secueles fuera perdiéndose’l tema pa convertise, más que nada, nuna socesión d’escenes de llucha llibre con disfraces de dinosaurios. Dacuando recuperaben la seriedá del film orixinal, pero nun tardaba en volver la primacía del puru espectáculu.
Per otru llau, les películes ficiéronse populares nos EE.UU. y productores del país consiguieron los drechos pa facer les sos versiones. Tanto la de 1998 como la qu’amasuñen dende 2014 resulten bien ofensives pa los xaponeses, y respondieron a la primera con Gojira 2000 y a la segunda con Shin Gojira, reimaxinaciones más apegaes a la seriedá orixinal. Agora, que ta’l Monsterversu americanu de moda, y tienen unes cuantes películes planificaes, los xaponeses vuelven a contraatacar con una película nueva: Gojira -1.0, col títulu internacional de Godzilla Minus One. Nella llévennos direutamente a los tiempos de posguerra, conque tien tola pinta de ser la más fiel qu’hubo nunca a la película orixinal, inclusive nel aspeutu’l monstruu. Eso sí, nun tenemos claro que seya una precuela (por muncho que diga’l títulu), pos al asoceder primero sedría raro que depués, en 1954, nun hubiera naide que reconociera’l dinosauriu. ¿Quiciabes la so destrucción de la ciudá nun pudo estremase de la de los Aliaos? Veremos.
Dexámosvos (calcando equí) l’avance internacional de la película, que va estrenase l’ún d’avientu. Nun tenemos nada claro, y ye una pena, que vaya estrenase tamién nel nuesu país, pos nun suel ser vezu que lleguen películes xaponeses por munchu presupuestu que tengan.
