L’otru día (equí) contábemos que nel universu espandíu de Star Wars esistía una estrella llamada Aviles, una lluna Asturias y una dinastía Oviedo, y cómo fora posible por aciu del Salón del Cómic d’Avilés. Pero resulta que nun ye l’únicu casu nel qu’esti nos punxo nel mapa internacional de la ficción.
Larry Hama, el míticu autor que guionizó etapes importantes de personaxes como Wolverine o Elektra, tamién tuvo visitando Avilés a cuenta del Salón, y llamó-y tanto l’atención qu’acabó faciendo qu’un personaxe de G.I. Joe, Storm Shadow (que sal nes trés películes d’aición real de la franquicia) viviera una hestoria na ciudá.
Una de les coses que más-y debió llamar l’atención foi l’escanciáu, porque ye como escomienza la hestoria de G.I. Joe: Storm Shadow #6, ilustrada por Mark A. Robinson; al protagonista, nada menos qu’un ninja, apláudenlu porque ye a echalo “like a native-born asturian“. Y si reconocéis el llugar, na imaxe d’un poco más embaxo, ye porque ta en Casa Alvarín.
Anque, por supuestu nun son too vacaciones lo qu’asocede na hestoria, y pronto les cais y les sableres de la ciudá vuélvense escenariu d’una batalla.
