La premisa ye surrealista dafechu, pero’l mundu del desendolcu de videoxuegos indie permite esto y muncho más. El Gaiteru Tever sorprendíanos a toos va poco con un single nel que la imaxe amosaba un gaiteru saltando d’una plataforma a otra en trés fondos bien estremaos: ún al aire llibre con praos y nel que puen vese no llonxano horros y l’Urriellu, otru que paez ser una mina, y un terceru más urbanu nel que sal l’HUCA en segundu planu.
Demientres tol single, el gaiteru va saltando enriba de “coronavirus” con güeyos de monstruu nel más puru estilu Super Mario. Amás, el gaiteru va pañando monedes que s’identifiquen con una B (¿Belarminos?).
Pero’l single de Tever nun ye un namás un decoráu que suena. Al contrario, ye posible xugar al xuegu na so páxina web oficial, de baldre totalmente: https://gaitahero.com/
L’únicu puntu negativu, si hai que dicir ún, ye que’l xuegu nun ta n’asturianu; lo que ye una pena pa un xuegu que se fai n’Asturies y fai d’Asturies un elementu importante.
