Vero Suari y Inaciu Galán son los ganadores del premiu María Josefa Canellada de Lliteratura Infantil y Xuvenil pola obra “La curuxa Catuxa” na que’l xuráu destacó «cómo se llogra renovar una tradición del imaxinariu colectivu universal adaptándola a la cultura asturiana, nuna obra pa primeros llectores na que destaquen, dende la cenciellez didáctica cola que ta escrita, los valores firmes que tresmite, y un léxicu escoyío y curiao».

Inaciu y Vero sois dambos co-autores duna única hestoria: ¿Cómo ye trabayar a cuatro manes? ¿Repartistis el trabayu? ¿Ún fai un capítulu y otru otru? ¿Partís duna idea o vais armándolu pel camín?

Vero – La obra ñació d’una manera natural, aportando idees al empar, nun podríamos dividir el cuentu, ye un trabayu totalmente n’equipu. Tenemos la suerte de que nun lo enfocamos como un trabayu, sinón como un proyectu onde dexamos volar la imaxinación y salir al neñu que llevamos dientro entovía.

Inaciu – Sí, ye frutu de conversaciones nes escursiones que facemos con un grupu d’amigues comunes y depués d’intercambiar correos y venos dempués pa correxir coses, ponenos d’alcuerdu, que nun ye siempres fácil (rises), y en xeneral, la obra llegó un momentu nel que foi evolucionando sola nes nueses cabeces.

¿Cuála ye la mayor dificultá de trabayar a comuña?

Inaciu – Nesti casu dificultá sacar tiempu pa sentanos cuando tocaba ponese coles partes series del llabor. Presentamos al Premiu María Josefa Canellada foi un poco por eso, por ponenos una fecha y acabar de reamatar el proyectu, que llevaba años dende qu’arranquemos con ello.

Ensin destapamientos… ¿Qué va atopar el llector en La curuxa Catuxa?

Vero – El cuentu surde d’una idea principal, que ye’l personaxe de Catuxa como una especie de fada de los dientes de la viesca. A partir d’ehí, visualizamos al momentu al restu de personaxes y l’ambiente onde se mueven. El llector adultu va atopar una obra con reminiscencies de cuentu clásicu, y la reciella va vivir aventures y maxa.

Inaciu – Ye importante saber qu’esta ye una obra de presentación del universu de Catuxa, que quier ser un personaxe que salga del llibru a otres actividaes, que tenga muncha presencia social, que llegue a les escueles, a los dentistes d’Asturies, a les families… Y esperamos poder facer más hestories nel futuru. Catuxa y los sos amigos son amás personaxes con valores como’l compañerismu, l’ecoloxismu, la solidaridá, la igualdá, el sofitu a la diversidá… Queríemos tresmitir valores, porque nun yera namás “asturianizar” el conceptu del “ratoncito Pérez o de la “Tooth Fairy”, sinón suma-y daqué más.

“El llector adultu va atopar una obra con reminiscencies de cuentu clásicu, y la reciella va vivir aventures y maxa”

¿Qué vos inspiró o vos motivó a facer esta obra?

Vero – Motivónos que yera necesario un personaxe como Catuxa, con dellos tintes mitolóxicos. De neños cuando díbamos a la viesca toos suñábemos dalguna vegada con atopanos con duendes o personaxes máxicos que viven na naturaleza, y prestaríanos que la reciella de güei pensare en Catuxa cuando los pás los lleven a esfrutar del monte asturianu.

Inaciu – Hai tamién un elementu de buscar normalizar la presencia del asturianu n’otru ámbitu de la vida, el momentu de cayer los dientes y tolo qu’arrodia a esa parte de la vida tan traumática pero al mesmu tiempu feliz polo qu’asocede alredor.

“Hai tamién un elementu de buscar normalizar la presencia del asturianu n’otru ámbitu de la vida, el momentu de cayer los dientes”


¿Pa qué públicu la encamentáis?

Vero – La obra encamentámosla pa neños y neñes que pasen pel trance de perder los primeros dientes de lleche, que nun lo vean como dalgo negativo sinón como una oportunidá pa conocer a Catuxa y les sos aventures.

Inaciu, yá fixeres el cuentu Nel, el coríu que nun sabía nalar” ¿Ye un xéneru nel que te sientes cómodu la lliteratura pa neños?

Inaciu – Ye un xéneru complicáu, nun creas. Xenérame muncha inseguridá nun saber si taré sabiendo llegar a los gustos de la edá pa la qu’escribes. Nesi sen foi mui útil y prestóme participar dellos años nes actividaes del Veranu Lliterariu de Corvera, qu’organiza’l SNL d’esti conceyu, con Rafa R. Valdés al frente, y que permite a autores con obra pa la reciella compartila directamente col públicu final y ver les reacciones, sentir les sos opiniones, ver qué funciona y qué non. Dende llueu ye un xéneru más qu’imprescindible pa garantizar ferramientes de tresmisión xeneracional del idioma.


Vero, ésti ye’l primer llibru que saques y fáeslo pela puerta grande, ganando ún de los premios de la Conseyería. ¿Da vértigu? ¿Qué otros proyeutos tienes en mente nesti o notros xéneros?

Vero – Ye un mecigayu d’ilusión, vértigu y sobre too respetu al ver el llistáu de gallardonaos na hestoria los premios. Hasta agora tolo qu’escribiere fueren artículos en VerAsturies.com y la revista Viaxast, de temes turísticos y culturales, y esto ye mui distinto. Cuando entamemos el cuentu, la finalidá principal yera facer una obra de calidá, que gustare a los neños y neñes y-yos ficiera pensar nos valores que tresmitíen los cuentos clásicos. Gustaríame siguir per esta llinia, y oxalá de la mano d’Inaciu, cuntando hestories a la reciella, porque cuando escribes pa ellos nun hai llendes a la fantasía y a vegaes dexes salir esi neñu que fuisti y nun habríemos perder naide.

“cuando escribes pa ellos nun hai llendes a la fantasía y a vegaes dexes salir esi neñu que fuisti y nun habríemos perder naide”

¿Plantegáisvos facer más coses a comuña nun futuru?

Inaciu – A min, si Vero m’aguanta, por supuestu (rises).

Vero – (rises) Yo cuento que sí, qu’acabaremos por facer más cosines lliteraries xuntos.

¿Cómo veis en xeneral la lliteratura asturiana anguaño?

Inaciu – Cuando conoces la hestoria de la lliteratura asturiana decáteste ensin dulda que tamos na edá d’oru, por númberu d’autores, calidá, editoriales y tantes y tantes coses. Ye verdá qu’hai munches materies pendientes: mayor difusión en medios, presencia en llibreríes, llibru dixital… pero los pasos daos nos cincuenta años últimos son ablucantes.

¿Y en particular pa rapacinos?

Vero – Edítense obres mui bien escrites y con gran calidá nes ilustraciones, el formatu de los llibros, la verdá ye que ye una pasada.

Inaciu – Comparto la visión de Vero, ye bien guapo tolo que se vien faciendo, n’especial dende Pintar-Pintar y Trabe, pero con otros exemplos notables.

Amás de llibros y de xuegos como los que fixo Acuto Xuegos, ¿Qué pensáis que fai falta pa que lasturianu pueda tar normalizáu ente los neños?

Inaciu – Los llibros son importantes, pero cualesquier persona que vea cómo se críen anguaños los neños y neñes, tien claro que lo que fai falta ye más audiovisual y música pa la reciella. Esti papel habría tar cubriéndolu la TPA, implantándose tamién nes redes con más puxu y con conteníos especiales pa la reciella. Güei ye misión imposible ufrir materiales n’asturianu cuando cries a un fíu nesta llingua. Dende PlayPresta tamos faciendo esfuercios por crear dalguna cosina, con Enrique Carballeira y los sos “Cuentos de trazu sueltu” o les collaboraciones cola Estaya de la Llingua d’Avilés pa xenerar materiales, pero ye una gota nun océanu de conteníos en castellán y otres llingües.

Como fiximos col restu de los ganadores de cómic y de poesía, dexámosvos un cachín de la obra premiada. Nesti casu l’entamu:

¡Mui bones, reciella! Si, soi yo’l que vos ta falando, esti vieyu texu. Quiero cuntavos una hestoria mui antigua, tan vieya como yo, que tengo más d’ochocientos años. Voi falavos d’una amiga mui especial que tengo nesta viesca, la curuxa Catuxa. ¿Nun la conocéis? Mmm… Eso ye que nunca vos cayó un diente. Pero nun vamos adelantanos. De mano tengo que presentávosla.

Leave a Reply

La to direición de corréu nun va espublizase. Los campos riquíos márquense con *