José Ángel Gayol (Mieres, 1977) ye una de les voces más relevantes de la lliteratura asturiana contemporánea. Ganó’l Premiu d’Ensayu de la Conseyería de Cultura Máximo Fuertes Acevedo en dos ocasiones, 2015 y 2019; y tamién el premiu Asturies Xoven de Poesía en 2006 amás de los premios “Elvira Castañón”, “Fernán Coronas” y “Xuan María Acebal”. En 2019 asoleyó “En primera persona”, ún llibru en formatu de diariu pol que yá lu entrevistamos en Refuelgu. Agora vuelve otra vez con “El Silenciu Invisible”, Premiu d’Ensayu “Máximo Fuertes Acevedo 2019” y Premiu de la Crítica 2020 a la narrativa n’asturianu.
El Silenciu Invisible ye un llibru que tien la particularidá de mecer reflexones personales, d’un calter bien ellaboráu y filosóficu, con estremaes obres d’arte de grandes pintores europeos.
¿Cómo surde la idea innovadora de mecer lliteratura y pintura?
Primero de too, gracies por invitame a esti espaciu d’alderique lliterariu. Préstame la oportunidá y allégrame qu’esista una iniciativa asina pa dar voz y tiempu a los y les escritores n’asturianu. Contestando a la entruga, en realidá nun ye tampoco demasiao innovadora la propuesta. Soi mui aficionáu a los ensayos de Rafael Argullol y en dalgún d’ellos, como en La atracción del abismo o Maldita perfección, apaecen pintures y l’autor realiza reflexones a partir de les pintures. Con riesgu de quitame méritu, nunca nun hai nengún llibru que sía absolutamente nuevu. Tou actu cultural xurde d’una idea previa o asienta, masque sía a medies, sobre una base anterior. Sí ye verdá que’l pesu de la pintura n’El silenciu invisible ye un pesu mayor que nes obres d’Argullol. Nel mio casu creyí que podía ser una bona manera de falar d’esi silenciu invisible al que nos condenen los medios de comunicación (que son preseos de les élites) cuando nos desinforman. Envede ruíu informativu, cuido qu’hai un silenciu comunicacional. D’eso, y d’otres coses, va’l llibru.
“Nunca nun hai nengún llibru que sía absolutamente nuevu. Tou actu cultural xurde d’una idea previa o asienta, masque sía a medies, sobre una base anterior”
¿Qué criteriu siguisti pa escoyer los cuadros?
En dellos casos determinaos cuadros suxiriéronme idees venceyaes al tema del ensayu, pongamos por casu no rellativo a la construcción del imaxinariu colectivu que realicen los medios de comunicación, y que nun se lleva a cabu d’una forma inocente sinón que ta mediatizada poles élites polítiques y económiques d’un país. N’otros casos, les pintures apaecieron na mio mente a partir del pensamientu, y el filu d’una reflexón recordóme un cuadru qu’entendía que podía ayudar a marcar, definir o sorrayar un matiz o aspectu concretu.
Una de les coses que llama l’atención del ensayu ye que va más allá de les idees propies. En munchos pasaxes hai un conocimientu fondu de los temes, y una interpretación de les obres de les posiciones filosófiques y polítiques del tiempu. ¿Llevóte munchu tiempu documentate?
Nun sabría exautamente cuantificar el tiempu que llevó escribir esti ensayu. De normal, el mio sistema o técnica d’escritura consiste nuna operativa bastante inconexa a partir d’apuntes que voi dexando nel cuadernu que siempre llevo conmigo. Escribo a mano primero qu’a ordenador. Y al repasar los cuadernos había una serie d’idees que se repetíen. Decatéme de que tenía’l xerme de daqué. A la base d’esi edificiu hubi de suma-y la mochila cultural de les mios llectures, tanto artístiques como filosófiques, y depués sí: depués tamién hubo una parte de de documentación y de y de preparación, que sobre manera sirve para da-y cohesión, como cementu de toes eses idees sueltes, pa cerrar con una última fase de redacción na que determinaes idees salen, otres munches asiéntanse, y dalgunes nueves entren p’acabar d’armar l’ensayu. Intento que’l testu en nengún momentu se contradiga. De fechu, pienso qu’escribir un ensayu rique más una preparación mental qua la escritura en sí. Lo más difícil ye ordenar un pequeñu sistema d’idees dientro de la cabeza. Yá nun quiero nin figurame cómo sedrá iguar ún d’esos grandes sistemes filosóficos que nacíen nes intelixencies privilexaes d’un Hegel o un Kant.
“pienso qu’escribir un ensayu rique más una preparación mental qua la escritura en sí. Lo más difícil ye ordenar un pequeñu sistema d’idees dientro de la cabeza”
Ún de los temes que toques delles veces ye la contaminación informativa, les fake news y les redes sociales. ¿Pienses que l’arte más clásicu ye una contraposición a les nueves formes qu’estes redes mos traen?
Non, en realidá tanto l’arte clásicu como los modernos sistemes de comunicación pretenden modular qué pensamos y cómo lo pensamos. Lo que sí hai ye una enclín perreru a la mentira. Les fake news son pures mentires, namás, solo eso. Cargaes amás col arma de la impunidá, na midida na que pues espublizar una fake new ensin que nin siquiera tenga apariencia de realidá. Abonda con que respuenda a los prexuicios del receptor.
El silenciu invisible xira al rodiu de tres conceptos. El primeru ye lo que yo llamo Verdá esterior, esto ye, la verdá oxetiva, la que nun vemos, la que tenemos que lleer ente llínees. Nós miramos per una ventana que ye la ventana informativa, lo que denomino ventana comunicacional, que representen los medios de comunicación. Depués ta’l conocimientu social, que ye esa información que los medios de comunicación tresmiten y que nun se correspuende cola Verdá esterior porque al traviés de la ventana comunicacional les élites deciden qué se pue ver y cuánto se pue ver de la Verdá esterior. En cuenta de la Verdá esterior, “esfrutamos” d’un conocimientu social que nun ye completu, que malpenes resume la realidá. Esto siempre esistió. Antes la ventana comunicacional yera’l cuadru y anguaño esa ventana comunicacional pue ser una rede social. Pero va dos sieglos sí había un mensaxe sinceru. Quiero dicir que la semántica construyíase con verdaes, con pallabres o imáxenes d’evocación simbólica (nada tan verdadero como La llibertá guiando al pueblu, de Delacroix), mientres qu’anguaño nun se tien entansiquiera’l procuru de midir qué se diz, cómo se diz y la veracidá de lo que se diz.
Viendo arte clásicu y reflexones filosófiques diríemos que tamos énte un mundu qu’acaba. ¿Cómo ves la situación del sistema educativu y, más concretamente, de la filosofía y les humanidaes na actualidá?
En verdá, tamos nun cambiu de paradigma. Pero tampoco hai que facer un drama d’ello. La hestoria de la humanidá consistió en sistemáticos cambios de perspectiva. Anque tengo bien claro que’l sistema educativu va mal, va mui mal, tamién ye verdá que non tan mal como podemos pensar. Siempre creyemos que’l sistema educativu ye peor que l’anterior.
Ye indiscutible, sicasí, que na actualidá atopamos unes clares deficiencies nos escolinos en llingua, matemátiques y filosofía, que son les materies de les que s’alimenten el restu de conocimientos. Los déficits en llingua lleva a l’ausencia de capacidá d’entender aquello que lleemos. Un pensamientu matemáticu ruin torga la capacidá de remanar un pensamientu abstractu que defina camudamientos teóricos y la so aplicación práctica, arriendes de tolo rellativo a los númberos na vida diaria, y en particular a la educación financiera. En pallabres de Benjamin Franklin, nesti mundu solo hai dos coses segures: la muerte y los impuestos. Sías vieyu o mozu, probe o ricu, tolos díes de la to vida van obligate a usar dineru. Una educación financiera básica vuélvenos seres indefensos. Les matemátiques son lo base de too ello. Y pa terminar la filosofía ye l’instrumentu o disciplina que nos enseña de manera ordenada o sistemática a dixerir los estímulos esternos, a ordenar los pensamientos, a llevar lo concreto a lo universal y al aviesu. La filosofía enseña a pensar (hai quien-y sal de manera natural y hailos que nun son a ello nin anque s’emperren).
“Tamos nun cambiu de paradigma. Pero tampoco hai que facer un drama d’ello”
En tou casu, eses tres competencies básiques empiecen pela llectura como ferramienta fundamental. Como diz el pedagogu Gregorio Luri, lleer consiste n’asitiar un testu dientro d’un contestu. Si almites acríticamente la información que recibes al traviés de medios escritos o audiovisuales, nun vas tar asitiando’l testu nun contestu, sinón asumiendo como verdá lo que ye solo engañu. Si escareces de comprensión llectora y nun dispones de bases filosófiques d’argumentación, ética, retórica o lóxica, vas vivir al debalu. La realidá ye un mar, y debaxo asoceden les coses verdaderamente importantes. Nun vas saber entender que ye aquello qu’en realidá te tán faciendo cuando, por exemplu, les lleis educatives falen de qu’hai que facilitar que los escolinos lleguen al mercáu de trabayu. Nun pues quedate nel mensaxe lliteral. Detrás d’esa fras hai una intención ideolóxica, una intención que, ente otres coses, busca que síamos acríticos.
Dices qu’al vivir el mundu virtual distorsiónase la realidá. ¿Cómo pienses que ta afeutando la llamada “era dixital” a la creación artística, tanto a la lliteraria como la pictórica? ¿Crees qu’hai signos de la nuesa época más allá de les temátiques o de representar les realidaes actuales?
La pictórica hai tiempu que camina per siendes que superen la pura representación y busca una estilización discursiva, un afondamientu de conceptos onde la figuración yá tien pocu sitiu. En términos pictóricos, quedéme nel sieglu XIX o principios del XX. Y dende llueu, interésame la pintura figurativa y menos otres corrientes de tipo vanguardista. A nivel lliterariu, cambia la espresión, porque’l mediu condiciona. Nostante, nun convién escaecer que lo importante nun ye’l mediu si esi mediu sirve namás que de soporte. Por exemplu, qu’agora cualquier escritor o aspirante a ello puea autoeditase nun meyora la calidá de les obres. L’editor filtra. Arriendes, ye necesariu un llabor d’espardimientu qu’enantes facíen les editoriales y, en munchos casos, l’autopublicación nun garantiza qu’heba grandes obres. Cada época ufrez les obras artístiques que son más representatives del carácter colectivu o imaxinariu simbólicu d’esa dómina. Nun somos la escepción. Nun pensemos que somos el colmu de la modernidá. Tolo rellativo a la información aceleróse, ya implicó cambios sociolóxicos. Pero pamidea la tecnoloxía nun meyoró tanto como queremos creyer. Na creación artística hai aspectos que nun camudaron. Siguimos escribiendo en solitú.
“qu’agora cualquier escritor o aspirante a ello puea autoeditase nun meyora la calidá de les obres”
Una reflexón que faes perinteresante sobre la llibertá y la igualdá y el rol de la esquierda llévate a dicir que la izquierda asume y acomoda’l discursu neolliberal. Y dices que la llibertá d’espresión forma parte de la naturaleza humana hasta que dexamos de considerala una ética natural pa convertila nun elementu moral y continxente. ¿Qué quies dicir esautamente con ello? ¿Cuál te paez qu’habría ser anguaño’l camín d’esa emancipación social que nun llega?
Hai munchos aspectos arreyaos a too esto que comentes. Per un llau, ye bien difícil ganar un partíu de baloncestu coles riegles del fútbol. Ye bien difícil que la izquierda puea ganar la partida al neolliberalismu coles riegles neolliberales. Ye prácticamente imposible. Vivimos dientro d’un discursu neolliberal y esi discursu neolliberal resignifica conceptos, inclusive los propios de la izquierda. Por contra, la izquierda nun supo resignificar determinaos términos que yá güei se venceyen abondo al neolliberalismu, términos como llibertá o igualdá, inclusive términos más cercanos a una tradición democristiana o de tipu conservador. Por exemplu, el conceptu de patria, que nun tendría de ser nin d’izquierdes nin de dereches. Y toos sabemos qué conteníu tien.
Ehí sí xuega un papel fundamental la llibertá d’espresión. Nel momentu que empezamos a llindar la llibertá d’espresión de dalguna manera, dalgo que formaría parte de la ética, convertímosla nun elementu propiu de la moral, y dicir moral ye dicir continxente. Les normes xurídiques son siempre contingentes. La ética, non. Porque les normes puen camudar d’un país a otru. La ética vendría ser, nun sentíu kantianu, aquello que puede ser llevao a llei universal. Anguaño la llei universal defínela la narrativa neolliberal y ende la izquierda perdió una importante batalla.
“la izquierda nun supo resignificar determinaos términos que yá güei se venceyen abondo al neolliberalismu, términos como llibertá o igualdá, inclusive términos más cercanos a una tradición democristiana o de tipu conservador. Por exemplu, el conceptu de patria, que nun tendría de ser nin d’izquierdes nin de dereches. Y toos sabemos qué conteníu tien”
La batalla decisiva, casi toi seguru, nun ye la emancipación social. Ye necesaria, pero nun toi seguru de pa quién o por qué. Sí toi convencíu de cuáles son les riegles del xuegu y cómo se tresmiten eses riegles. De fechu, eso ye lo que tento de reflexar nel llibru: que la xente nun crea tolo que llee (tampoco El silenciu invisible), tolo que ve na televisión, o tolo qu’escuche na radio. Porque too eso respuende a una planificación perfectamente estudiada. Nun entro en si ye bona o mala, solo digo que respuende a una planificación mui clara y con un oxetivu persistente y sosteníu nel tiempu.
Otra de les reflexones más interesantes que faes nel llibru ye al rodiu’l tema de la posverdá, que defendes llamala como lo que ye: Bilordiu o mentira. ¿Hai muncho de 1984 y de Nueva Fala nel llinguaxe políticu d’anguaño? ¿Cómo te paez que debería combatise estes estratexes d’intoxicación que vemos na prensa a diario? ¿Qué rol tienen los pensadores nesto? ¿Piensas que la política los escucha?
Empiezo pel final: non, anguaño los pensadores, filósofos, sociólogos, antropólogos, escritores tienen pocu pesu na formación del pensamientu colectivu. Nun tamos nos años 60 nin nos años 70, onde un escritor podía salir na televisión y el so allugamientu éticu intelectual influyía na opinión pública. Güei cualesquier vendefumu, con un númberu de siguidores apropiaos en redes sociales, pue publicitar la primer tontura que se-y pase pela cabeza o una tochada pola que dalguién-y pague. Y sí, hai muncho de Nueva Fala nel llinguaxe políticu. Llamar posverdá a lo que ye pura mentira amuesa a les clares lo qu’enantes falábemos sobre la educación. Cuando s’escucha pontificar de la llibertá pa escoyer un colexu pa un fíu, nun tamos ante un debate sobre la llibertá, sinón sobre les llendes de la segregación social o’l clasismu. Pero eses palabres son fees y convién usar otres.
“Cuando s’escucha pontificar de la llibertá pa escoyer un colexu pa un fíu, nun tamos ante un debate sobre la llibertá, sinón sobre les llendes de la segregación social o’l clasismu. Pero eses palabres son fees y convién usar otres”
¿En qué otros proyeutos andes metíu agora? ¿Vamos ver una segunda parte?
Non, nun va haber una segunda parte. Agora mesmo los proyectos más cercanos que tengo son la promoción de la mio última novela, La xeometría secreta del azar, preparar un llibru de relatos que va salir esti añu y que tengo l’enfotu de que va ser el mio meyor llibru (creo que ye un llibru bonu y eso que soi bien críticu conmigo mesmu) y toi trabayando pa cerrar la segunda entrega del mio diariu (el qu’entamó con En primera persona). Paezme que yá ta bien.
Si los nuesos llectores quieren mercar El Silenciu Invisible, val con calcar equí y mercalu na páxina web de la editorial Trabe.
