Va seis meses salió, ensin saber naide l’ésitu que diba algamar, un videoxuegu d’estética anime, bonos gráficos y un mundu abiertu al que se-y van sumando nueves misiones o zones de mapa y con variedá de personaxes. El xuegu ye free to play, ye dicir, gratis, y ta disponible n’ordenador, PS4 y móvil. Esti xuegu ta desendolcáu pol estudiu chinu Mihoyo, qu’anteriormente desarrolló otru xuegu tamién conocíu nomáu Honkai Impact 3D.
La historia principal del xuegu entama con dos hermanos mellizos, que lleguen a Teyvat, el mundu onde se desendolca tol xuegu, a los qu’ataca una diosa de la qu’entá nun sabemos el nome, y ente los que tienes qu’escoyer porque ún d’ellos va ser el to personaxe principal pa l’aventura, mientres que l’otru secuéstralu la diosa y pierdes el conocimientu. Dempués despiertes al llau nuna playa y conoces a Paimon, una especie d’espíritu qu’entama a acompañate y descubrir esti mundu, onde veneren a los Arcontes, a los que tienes que dir buscando per tol mundu pa que t’ayuden a saber quién ye y alcontrar a la diosa que t’atacó y que tien al to hermanu. Esta historia principal va entemeciéndose cola historia de los otros personaxes que vas atopando y que pues dir consiguiendo pal to equipu.
D’esti nuevu mundu podemos contar munches coses, ente elles qu’hai persones que tienen poderes elementales concedíos polos Arcontes, que son dioses a los que veneren nes distintes zones del xuegu. Estos Arcontes tán venceyaos a les distintes zones del mapa, que nun ta completu, y del que solo conocemos dos: Mondstadt (de corte occidental inspiráu n’Alemaña medieval) y Liyue (con estética China tradicional). Col pasu los meses van dir añadiéndose nueves zones, de les que solo conocemos el nome, inspiraes n’otros sitios y cultures reales. Tamién que ye un mundu nel qu’hai mazmorres con distintos niveles, cofres y un montón de puzzles y pruebes.
El xuegu engancha y lo de que sía gratis fai que lu puedas probar ensin arrepentite (más allá del tiempu que tardes en descargalu), pero, ¿ye 100% gratis? Sí, pero esi sí ya más bien un “sí”: ye verdá que pues consiguir los personaxes y les armes y subir de nivel ensin gastar perres, pero ensin gastar nada tienes qu’invertir un montón de tiempu y esfuerzu. El mou de consiguir personaxes nel xuegu ye un sistema que tienen otros xuegos llamáu gacha, nel que tienes que xugar, nesti casu con unos oxetos que llamen deseos, y gastalos pa, por azar, consiguir a los personaxes y les armes más potentes, que te toquen con munchísima menos frecuencia qu’armes básiques. Estos deseos puen consiguise con protoxemes, que pues dir algamando con munchu esfuerzu coles distintes misiones, cofres y descubrimientos nel mapa, o bien mercándoles con dineru real. Pero invertir dineru real nun t’asegura dir consiguir el personaxe. Esti fechu ta faciendo que la xente invierta unes cantidaes pergrandes de perres pa consiguir los personaxes nuevos que va apaeciendo, hasta tal puntu que col llanzamientu de personaxes como Zhongli, Ganyu o Xiao, la xente gastó en total más de 40 millones de dólares a nivel mundial. Esto ta faciendo que la Unión Europea se te plantegando investigalos pola adicción que xenera. Sicasí, nun ye obligatorio gastar nin un euru, ye opcional.
El xuegu tamién tuvo otra polémica, sobre too cuando taba acabante de salir, y ye que tanto les habilidaes como los mapes y tamién los enemigos son demasiao paecíos al Zelda: Breath of the Wild. Tamién se puen detectar otros sistemes y movimientos en combate paecíos a xuegos como’l Nier:Autómata. Esto xeneró munchísima polémica, pero tampoco conocemos si hubo aiciones llegales por esti supuestu plaxu. Ye verdá qu’hai muncho asemeyao, pero tamién hai munches diferencies, polo que la llende ente plaxu o inspiración nun ta clara.
Si vos animáis a probalu, podéis descargalu tanto na páxina oficial del xuegu como nes distintes tiendes de les otres plataformes nes que se pue xugar. Amás, podéis xugalu en distintos idiomes, ente ellos, n’español.