Pueque dalgún se sorprienda si nun taba enteráu de que lleven tiempu planiando esta continuación, pos la película orixinal nun tenía pinta de dar munchu pie a una segunda parte. Por embargu, nun ye tampoco que tean plantegándose resucitar al yá míticu Máximu Décimu Meridiu, el personaxe protagonista interpretáu por Russell Crow.
La idea ye, cuenten, que’l protagonista seya Lucius, el guaḥucu, yá crecíu, que yera sobrín del malváu Cómodu. A esti nun lu va interpretar l’actor orixinal, sinón Paul Mescal (Aftersun), y sabemos tamién que va empezar a rodase yá en namás unes selmanes, la mayor parte de la película en Marruecos. El direutor y productor ye de nueves Ridley Scott, y la estrena ta fechada pa finales de 2024. Nun hai confirmación d’ello, pero hai informaciones bastante fundaes qu’apunten a que Connie Nielsen repetiría nesta película’l papel de Lucilla, madre del protagonista.
Gladiator, la película orixinal, estrenóse nel añu 2000, cuando yá paecía que diba tiempu que pasara la dómina de les películes de romanos, foi un ésitu nos cines y consiguió llevar cinco Oscar, ente ellos el de meyor película y el de meyor actor protagonista. Tiense falao d’una segunda parte dende 2018, pero ye agora cuando por fin escomienza a facese realidá.
